Psaumes 135

Louez le nom du Seigneur

Whakamoemititia a Ihowā! Whakamoemititia te ingoa o Ihowā; whakamoemititia ia, e ngā pononga a Ihowā, ²e koutou e tū nei i roto i te whare o Ihowā, i ngā marae o te whare o tō tātou Atua. ³Whakamoemititia a Ihowā; he pai hoki a Ihowā; hīmene atu ki tōna ingoa; he mea āhuareka hoki tēnā.

⁴Kua whiriwhiria hoki e Ihowā a Hākopa māna, a Īharaira hei tino taonga mōna. ⁵E mātau ana hoki ahau he nui a Ihowā; kei runga atu hoki tō tātou Ariki i ngā atua katoa. ⁶Ko ngā mea katoa i pai ai a Ihowā, kua oti i a ia, i te rangi, i te whenua, i ngā moana, i ngā wāhi hōhonu katoa.

⁷Nāna i pupū ake ai ngā kohu i ngā pito o te whenua; i hangā e ia ngā uira mō te ua; e whakaputaina mai ana e ia te hau i roto i ōna whare taonga. ⁸Nāna nei i patu ngā mātāmua o Īhipa, a te tangata, a te kararehe; ⁹i tonoa e ia he tohu, he merekara ki waenganui ōu, e Īhipa; ki runga ki a Parao rātou ko āna pononga katoa.

¹⁰Nāna i patu ngā iwi maha, i whakamate ngā kīngi rarahi – ¹¹a Hihona kīngi o ngā Amori, a Oka kīngi o Pahana, me ngā rangatiratanga katoa o Kanaana – ¹²ā, hōmai ana e ia tō rātou whenua hei kāinga pūmau, hei kāinga pūmau mō Īharaira, mō tāna iwi.

¹³E Ihowā, pūmau tonu tōu ingoa, me tōu maharatanga, e Ihowā, ki ngā whakatupuranga katoa. ¹⁴Ka whakawā hoki a Ihowā mō tāna iwi; ā, ka puta kē tōna whakaaro ki āna pononga. ¹⁵He hiriwa, he kōura ngā whakapakoko a ngā tauiwi, he mahi nā te ringa tāngata.

¹⁶He māngai ō rātou, ā, kāhore e kōrero; he kanohi ō rātou, ā, kāhore e kite; ¹⁷he taringa ō rātou, ā, kāhore e rongo, kāhore anō he manawa i ō rātou māngai. ¹⁸Ka rite ki a rātou te hunga nāna rātou i hanga; āe, me ngā tāngata katoa e whakawhirinaki ana ki a rātou.

¹⁹Whakapaingia a Ihowā, e te whare o Īharaira! Whakapaingia a Ihowā, e te whare o Ārona! ²⁰Whakapaingia a Ihowā, e te whare o Rīwai! Whakapaingia a Ihowā, e te hunga katoa e wehi ana i a Ihowā! ²¹Kia whakapaingia a Ihowā i roto i Hiona, e noho nei i Hiruhārama. Whakapaingia a Ihowā!