Proverbes 21

Le coeur du roi est dans sa main

Kei roto te ngākau o te kīngi i te ringa o Ihowā ānō he awa rerenga wai; e whakaangahia ana e ia ki ngā wāhi katoa e pai ai ia. ²Ko ngā ara katoa o te tangata, tika kau ki ōna kanohi ake; ko Ihowā ia hei pāuna i ngā ngākau. ³Ko te mahi i te tika, i te whakawā, ki tā Ihowā, pai atu i te patunga tapu.

⁴He kanohi whakakake, he ngākau whakapehapeha, ā, ko te rama hoki o te hunga kino, he hara kau. ⁵Ko ngā whakaaro o te tangata uaua e ahu anake ana ki te hua o te taonga; ko te hunga tākare katoa ia e whawhai kau ana ki te mūhore. ⁶E rite ana tā te arero teka āmi i te taonga ki te mamaoa e āia noatia ana; ko te hunga e rapu ana i ērā e rapu ana i te mate.

⁷Mā te pāhua a te hunga kino e tahi atu rātou; mō rātou kāhore e pai ki te whakawā. ⁸He ara tino kōpikopiko tō te tangata e waha ana i te hara; tēnā ko te tangata mā, he tika tāna mahi. ⁹He pai kē te noho i te kokonga o te tuanui, i te noho tahi me te wahine ngangare i roto i te whare māhorahora.

¹⁰Ko tā te wairua o te tangata kino he hiahia ki te kino; e kore ōna kanohi e manako ki tōna hoa. ¹¹Ki te whiua te tangata whakahī, ka whai whakaaro te kūware; ā, ki te whakaakona te tangata whakaaro nui, ka whiwhi ia ki te mātauranga. ¹²Ka āta whakaaroa e te tangata tika te whare o te tangata kino; te pēheatanga e whakatakā ai te hunga kino ki te mate mō rātou.

¹³Ko te tangata e puru ana i ōna taringa ki te karanga a te rawakore, tērā hoki ia e karanga, heoi e kore e whakarangona. ¹⁴Mā te mea hōmai puku ka mārie ai te riri, mā te moni whakapati hoki i roto i te uma ka mārie ai te āritarita kaha. ¹⁵He mahi koa nā te tangata tika te whakawā; mō ngā kaimahi ia i te kino, ko te whakangaromanga.

¹⁶Ko te tangata e kotiti kē ana i te huarahi o te mahara, ka noho ia i te whakaminenga o ngā tūpāpaku. ¹⁷Ko te tangata matenui ki ngā āhuareka, ka rawakore; ā, ko te tangata e matenui ana ki te wāina, ki te hinu, e kore e whai taonga. ¹⁸Hei utu te tangata kino mō te tangata tika; ā, ka haere mai te tangata kōpeka hei whakakapi mō te tangata tū tika.

¹⁹He pai kē te noho i te koraha, i te noho tahi me te wahine tohetohe, wahine pukukino. ²⁰Kei te nohoanga o te tangata whakaaro nui te taonga mōmōhanga me te hinu; heoi maumauria ake e te wairangi. ²¹Ko te tangata e whai ana i te tika, i te atawhai, ka whiwhi ki te ora, ki te tika, ki te hōnore.

²²Ka pikitia e te tangata whakaaro nui te pā o ngā mārohirohi, ka taka hoki i a ia te kaha i whakawhirinaki ai rātou. ²³Ko te tangata e tiaki ana i tōna māngai, i tōna arero, e tiaki ana i tōna wairua kei raru. ²⁴Ko te tangata whakakake, whakapehapeha, ko te tangata whakahī tōna ingoa, e mahi ana ia i runga i te whakahirahira o tōna whakamanamana.

²⁵Ka mate te tangata māngere i tōna hiahia anō; e kore hoki ōna ringa e pai ki te mahi. ²⁶Tērā te hanga he kaiapo tonu ā pau noa te rā; ko tā te tangata tika ia he hōmai, kāhore hoki āna kaiponu. ²⁷He mea whakarihariha te whakahere a te tangata kino; tērā noa ake ina hē te whakaaro i kawea mai ai e ia.

²⁸Ka mate te kaiwhakaatu teka; nā, ko te tangata whakarongo, ka kōrero, kāhore he kaiwhakahē. ²⁹Ka whakamārō te tangata kino i tōna mata; tēnā ko te tangata tika, ka whakapai i ōna ara. ³⁰I tō Ihowā aroaro kāhore he whakaaro nui, kāhore he mātauranga, kāhore he kupu mōhio, e tū.

³¹Kua rite noa ake he hōiho mō te rā o te whawhai; kei a Ihowā ia te whakaoranga.