Proverbes 1

La crainte du Seigneur est le commencement

Ko ngā whakatauki a Horomona tama a Rāwiri, kīngi o Īharaira. ²E mōhiotia ai te whakaaro nui, te ako, e kitea ai ngā kupu o te mātauranga, ³e riro mai ai te ako a te ngākau mahara, te tika, te whakawā, te mea anō e rite ana.

⁴Hei hoatu i te ngākau tūpato ki ngā kūware, i te mātauranga, i te ngārahu pai ki te taitamariki. ⁵Kia whakarongo ai te tangata whakaaro nui, kia nui ake ai tōna mōhio; kia whiwhi ai te tangata tūpato ki ngā whakaaro mōhio; ⁶e mōhio ai ia ki te whakatauki, ki te kupu whakarite, ki ngā kupu a ngā whakaaro nui, ki ā rātou kōrero whakapeka.

⁷Ko te wehi ki a Ihowā te tīmatanga o te mātauranga; e whakahāwea ana te whakaarokore ki te whakaaro nui, ki te ako.

Ne va pas avec eux

⁸Whakarongo, e tāku tama, ki te ako a tōu pāpā, kaua hoki e whakarērea te ture a tōu whaea; ⁹ka waiho hoki ēnā hei pare ātaahua mō tōu mātenga, hei mekameka whakapaipai mō tōu kakī. ¹⁰E tāku tama, ki te whakawaia koe e te hunga hara, kaua e whakaae.

¹¹Ki te mea rātou, “Tātou ka haere, ka whakapapa atu, ka whakaheke toto; kia whanga puku tātou, he mea takekore, mō te tangata harakore; ¹²horomia oratia rātou e tātou, pērātia me tā te rua tūpāpaku; ka riro tinana rātou, ka pērā me te hunga e heke atu ana ki te poka. ¹³Ka kitea e tātou ngā taonga utu nui katoa; ka whakakīia ō tātou whare ki tā tātou e pāhua ai.

¹⁴Makā mai tōu wāhi ki roto ki tō mātou; kia kotahi te pūtea mā tātou katoa” – ¹⁵e tāku tama, kaua e haere tahi i te ara me rātou, kaiponuhia tōu waewae i tō rātou huarahi; ¹⁶e rere ana hoki ō rātou waewae ki te kino, e hohoro ana rātou ki te whakaheke toto.

¹⁷He maumau hoki te hora o te kupenga ki te tirohanga a tētahi manu; ¹⁸ko rātou, he whakaheke i ō rātou toto anō i whakapapa ai rātou; he whakamate i a rātou anō i piri ai rātou. ¹⁹Ka pēnā ngā huarahi o te hunga apo taonga; ko te ora anō o ōna rangatira e tangohia.

La sagesse crie dans les rues

²⁰E hāmama ana te whakaaro nui i te huarahi; e puaki ana tōna reo i ngā waharoa. ²¹E karanga ana ia i te tino wāhi whakaminenga; i te wāhi tuwhera o ngā kūwaha, i roto i te pā, e puaki ana āna kupu: ²²“E te hunga kūware, kia pēhea ake te roa o tō koutou aroha ki te kūwaretanga? O te hiahia rānei o te hunga whakahī ki tō rātou whakahī? O te whakakino rānei a te hunga wairangi ki te mātauranga?

²³Tahuri mai ki tāku ako; nā, ka ringihia e ahau tōku wairua ki a koutou, ka whakaaturia āku kupu ki a koutou. ²⁴I karanga atu hoki ahau, heoi kīhai koutou i pai mai; i totoro atu tōku ringa, ā, kīhai tētahi i whai whakaaro mai; ²⁵heoi, whakakāhoretia iho e koutou tōku whakaaro katoa, kīhai hoki i aro ki tāku ako.

²⁶Mō reira ka kata ahau i te rā o tō koutou aituā; ka tāwai ina pā te pāwera ki a koutou; ²⁷ina tae mai tō koutou pāwera ānō he tūpuhi, ā, ka pā mai tō koutou aituā ānō he paroro; ina tae mai te pōuri me te ngākau mamae ki a koutou. ²⁸“Ko reira rātou karanga ai ki ahau, ā, e kore ahau e whakahoki kupu atu; ka rapu nui rātou i ahau, otiia e kore ahau e kitea e rātou.

²⁹Mō rātou i kino ki te mātauranga; kīhai hoki i whiriwhiria e rātou te wehi ki a Ihowā; ³⁰kīhai i aro mai ki ōku whakaaro; whakahāwea ana rātou ki tāku kupu riri katoa, ³¹nā reira ka kai rātou i ngā hua o tō rātou nei ara, ka whakakīia anō hoki ki ngā mea i titoa e rātou.

³²Ko te tahuritanga atu hoki o ngā kūware hei patu i a rātou; ko te ngākau warea anō hoki o ngā wairangi hei huna i a rātou. ³³Ko te tangata ia e rongo ana ki ahau, ka au tōna noho, ka ātea hoki i te wehi ki te kino.”