Psaumes 83

Ne garde pas le silence, ô Dieu

Ingoma. Ihubo lika-Asafi. Oh Nkulunkulu, ungathuli uthi zwi; ungangincitshi indlebe yakho, ungameli khatshana lami, Oh Nkulunkulu. ²Akubone ukuthi ziphithizela kanjani izitha zakho, ukuthi ziwaqaphisa kanganani amakhanda azo. ³Ngobuqili zakhela abantu bakho amacebo; zisongela labo obathembileyo.

⁴Bathi, “Wozani kasibabhuqe du njengesizwe, ukuze ibizo lika-Israyeli lingaphindi likhunjulwe.” ⁵Nganhliziyonye bawakha amacebo ndawonye; bayahlangana beme ndawonye ukumelana lawe, ⁶amathente ase-Edomi lama-Ishumayeli, awamaMowabi lawamaHagari, ⁷amaGebhali, lama-Amoni lama-Amaleki, amaFilistiya labantu beThire.

⁸Lama-Asiriya asebambene labo ukuqinisa izizukulwane zikaLothi. ⁹Yenza kubo njengoba wenza eMidiyani, njengowakwenza kuSisera loJabhini emfuleni iKhishoni, ¹⁰ababhubha e-Endo baba njengezibi emhlabathini.

¹¹Yenza izikhulu zabo zibe njengo-Orebhi loZebhi, wonke amakhosana abo abe njengoZebha loZalimuna, ¹²abathi, “Kasiwathumbe amadlelo kaNkulunkulu.” ¹³Benze babe njengenkunkuma, Oh Nkulunkulu wami, njengamakhoba ephetshulwa ngumoya.

¹⁴Njengalokhu umlilo uhangula igusu kumbe ilangabi lilumathisa izintaba, ¹⁵kanjalo basukele ngesivunguvungu sakho ubethuse ngesiphepho sakho. ¹⁶Bahuqe ubuso babo ngehlazo ukuze abantu balidinge ibizo lakho, Oh Thixo.

¹⁷Sengathi bangayangeka lanini badunyazwe; kungathi bangafa belehlazo. ¹⁸Yenza bakwazi ukuthi wena, obizo lakho unguThixo ukuthi wena wedwa ungoPhezukonke emhlabeni wonke.