Psaumes 81

Ouvre ta bouche et je la remplirai

Kumqondisi wokuhlabela. Ngendlela yegithithi. Elika-Asafi Hlabelelani ngentokozo kuNkulunkulu ongamandla ethu; memezani kakhulu kuNkulunkulu kaJakhobe! ²Qalisani ukuhlabela, tshayani isigubhu, khalisani ichacho elimnandi lomhubhe. ³Khalisani uphondo lwenqama ekuThwaseni kweNyanga, lalapho inyanga isigcwele, ngelanga lomkhosi; ⁴lesi yisimemezelo sika-Israyeli, umthetho kaNkulunkulu kaJakhobe.

⁵Wakumisa njengesimiso kuJosefa lapho aphuma wavukela ilizwe leGibhithe, lapho ezwa khona ulimi esasingaluzwa. Ngezwa ilizwi engingalaziyo lisithi: ⁶“Ngawethula umthwalo emahlombe abo; izandla zabo zakhululwa engcebethwini. ⁷Ekuhluphekeni kwenu lamemeza mina ngalikhulula. Ngaliphendula ngiphakathi komdumo weyezi; ngalilinga emanzini aseMeribha.

⁸Zwanini, awu bantu bami, mina ngizalixwayisa aluba lingangilalela, Oh Israyeli! ⁹Lingabi lonkulunkulu wezizweni phakathi kwenu; lingabokhothamela unkulunkulu ongaziwayo. ¹⁰NginguThixo uNkulunkulu wenu, owalikhuphayo eGibhithe. Vulani kakhulu umlomo wenu ngizawugcwalisa.

¹¹Kodwa abantu bami kabangilalelanga; u-Israyeli wala ukungithobela. ¹²Ngakho ngasengibayekela ngezinhliziyo zabo zobuqholo ukuthi balandele lokho abakufunayo. ¹³Aluba abantu bami bengangilalela, aluba u-Israyeli engalandela izindlela zami, ¹⁴masinyane nje ngingazibhuqa izitha zabo ngiphakamisele isandla sami ezitheni zabo!

¹⁵Labo abamzondayo uThixo bangatshotshobala phambi kwakhe, kuthi isijeziso sabo sibe ngesaphakade. ¹⁶Kodwa lina lingaphiwa ingqoloyi enhle kakhulu; ngilisuthise ngoluju oluphuma edwaleni.”