Psaumes 55

Décharge ton fardeau sur le Seigneur

Kumqondisi wokuhlabela. Kutshaywa iziginci. Ihubo likaDavida. Lalela umkhuleko wami, Oh Nkulunkulu, ungafulatheli isikhalazo sami; ²ngizwa ungiphendule. Imicabango yami iyangikhathaza, ngididekile ³ngelizwi lesitha sami, lokunyonkolozwa ngababi; ngoba bangibangela inhlupho bangithuka bethukuthele.

⁴Inhliziyo yami iyatshiseka ngaphakathi kwami; ukwesaba ukufa kuyangiqinela. ⁵Ukwesaba lokuthuthumela sekungihlasele; isithuli sesingigabhela. ⁶Ngathi, “He, aluba ngangilamaphiko njengejuba! Ngangizaphapha ngizoziphumulela kude.

⁷Ngangizabaleka ngiye kude ngiyehlala enkangala; ⁸ngangizaphanga ngiye enqabeni yami, kude kwesikhukhula lesiphepho.” ⁹Sanganisa ababi, Oh Thixo, sanganisa ukukhuluma kwabo, ngoba ngibona udlakela lengxabano edolobheni.

¹⁰Emini lebusuku bayacathama emidulini yalo; umona lenzondo kugcwele lapho. ¹¹Imimoya yokubhidliza yiyo esibusa; izisongo lamanga akusasuki emigwaqweni. ¹²Aluba ngithukwa yisitha ngingakubhensela lokho; aluba ongizondayo engivukela ngingamcatshela.

¹³Kodwa nguwe, umuntu njengami, umkhula wami, umngane wami oseduze, ¹⁴engake ngaba lobudlelwano obukhulu laye lapho sasihamba ndawonye labanengi endlini kaNkulunkulu. ¹⁵Yekela ukufa kuzijume izitha zami; yekela bagqitshelwe bephila engcwabeni, ngoba ububi buthe khoxo phakathi kwabo.

¹⁶Kodwa ngiyambiza uNkulunkulu, uThixo angisindise. ¹⁷Kusihlwa, ekuseni lemini ngiyakhala ngisosizini, yena uyalizwa ilizwi lami. ¹⁸Uyangihlenga ngingakalimali kuleyompi engihlaselayo, loba bebanengi abaxabana lami.

¹⁹UNkulunkulu osesihlalweni sobukhosi lanininini, uzabezwa abachithachithe abantu abangaguqukiyo ezindleleni zabo njalo abangamesabiyo uNkulunkulu. ²⁰Umkhula wami uyabahlasela abangane bakhe; wephula isivumelwano asenzayo. ²¹Inkulumo yakhe ibutshelezi njengolaza, kodwa kulempi enhliziyweni yakhe amazwi akhe alolozela ukwedlula amafutha kodwa abukhali kulensingo.

²²Yethula inswelo zakho kuThixo yena uzakusekela; akazukuyekela abalungileyo bawe. ²³Kodwa wena, Nkulunkulu ababi uzabawisela egodini lokungcola; abantu abomele igazi njalo abakhohlisayo kabasoze bayiphile ingxenye yezinsuku zabo. Kodwa mina, ngithemba kuwe.