Psaumes 107

Qu'ainsi disent les rachetés du Seigneur

Mbongeni uThixo ngoba ulungile, uthando lwakhe lumi laphakade. ²Akuthi abahlengiweyo bakaThixo batsho lokhu, labo abahlenga esandleni sesitha, ³labo abaqoqa emazweni kusuka empumalanga kusiya entshonalanga, kusuka enyakatho laseningizimu.

⁴Abanye bantula egwaduleni lwenkangala, baswela indlela eya emzini ababengahlala khona. ⁵Balamba boma, impilo zabo zancipha. ⁶Basebekhala kuThixo besekuhluphekeni kwabo, wasebakhulula osizini lwabo.

⁷Wabahola ngendlela eqondileyo baya edolobheni lapho ababengahlala khona. ⁸Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu, ⁹ngoba ubenza bakholwe abomileyo asuthise abalambileyo ngezinto ezinhle.

¹⁰Abanye bahlala emnyameni lasethunzini elinzima beyizibotshwa ezihluphekayo zibotshwe ngamaketane ensimbi, ¹¹ngoba babewahlamukele amazwi kaNkulunkulu beyisa iseluleko soPhezukonke. ¹²Ngakho wabathwalisa umsebenzi onzima; bawa kodwa kungekho ongabasiza.

¹³Ngakho basebekhala kuThixo besekuhluphekeni kwabo wabasindisa osizini lwabo. ¹⁴Wabakhupha emnyameni lethunzini elinzima waqamula amaketane abo. ¹⁵Ngakho kabambonge uThixo ngothando lwakhe olungaphuthiyo lezenzo zakhe ezimangalisayo azenzela abantu, ¹⁶ngoba uyawafohloza amasango ethusi ephule imigoqo yensimbi.

¹⁷Abanye baba yiziwula ngenxa yezindlela zabo zokuhlamuka badliwa yizinhlupheko ngenxa yokuxhwala kwabo. ¹⁸Benyanya konke ukudla balengela emasangweni okufa. ¹⁹Bakhala kuThixo besekuhluphekeni kwabo, wabasindisa osizini lwabo.

²⁰Wathumela ilizwi lakhe labasilisa; wabahlenga engcwabeni. ²¹Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini. ²²Kabenze imihlatshelo yeminikelo yokubonga bafakaze ngezenzo zakhe zonke ngezingoma zokuthokoza.

²³Abanye bawela olwandle ngemikhumbi; babengabathengisi emanzini abanzi. ²⁴Bayibona imisebenzi kaThixo, izenzo zakhe ezimangalisayo ekujuleni. ²⁵Ngoba wakhuluma kwaqubuka isiphepho esasukumisa amagagasi aba laphaya.

²⁶Akhwela athinta emazulwini, ehla ayatshona ezinzikini; bekuleyongozi isibindi sabo samemetheka saphela. ²⁷Bazigxobagxoba badiyazela njengabantu abadakiweyo; baphelelwa lulwazi. ²⁸Basebekhala kuThixo besekuhluphekeni kwabo, wabakhupha esizini lwabo.

²⁹Wasethulisa isiphepho ngokunyenyeza; amagagasi olwandle aphola athi cwaka. ³⁰Bajabula bonke sekudedile, wabahola wabasa ethekwini ababelifuna. ³¹Kabambonge uThixo ngothando lwakhe olungaphuthiyo lezenzo zakhe ezimangalisayo ebantwini.

³²Kabamphakamise emhlanganweni wabantu bamdumise enkundleni yabadala. ³³Waguqula imifula yaba yinkangala, imithombo egelezayo yaba ngumhlabathi owomileyo, ³⁴lomhlabathi olezithelo waba lugwadule oluletshwayi, ngenxa yobubi balabo ababehlala khona.

³⁵Waguqula inkangala yaba ngamachibi amanzi lomhlabathi owomileyo waba yimithombo egelezayo; ³⁶lapho waletha abalambileyo ukuba bahlale khona, khonapho basungula umuzi ababezahlala kuwo. ³⁷Bahlanyela amasimu, bagxumeka amavini athela isivuno esikhulu; ³⁸wababusisa banda baba banengi kakhulu, akaze ayekela imihlambi yabo inciphe.

³⁹Kwasekusithi ubunengi babo sebunciphile, bathotshiswa ngokuncindezelwa, ngokuhlupheka langosizi; ⁴⁰kwathi yena othela ihlazo ezikhulwini wabantulisa egwaduleni olungakhanyi mzila. ⁴¹Kodwa abaswelayo wabakhupha ekuhluphekeni kwabo wandisa izimuli zabo njengemihlambi yezimvu.

⁴²Abaqotho bayabona bathokoze, kodwa bonke ababi bagcike imilomo yabo. ⁴³Lowo ohlakaniphileyo, kaqaphele lezizinto anakane ngothando olukhulu lukaThixo.