Job 38

Où étais-tu quand je fondais la terre

UThixo wasekhuluma loJobe ephakathi kwesiphepho. Wathi: ²“Ngubani na lowo odunga amacebo ami ngamazwi okungazi? ³Qina njengendoda; ngizakubuza, lawe uzangiphendula.

⁴Wawungaphi lapho ngibeka izisekelo zomhlaba na? Ngitshela nxa uqedisisa. ⁵Ngubani owamisa izilinganiso zawo na? Phela angithi uyazi! Ngubani owayidonsayo intambo yokulinganisa kuwo na? ⁶Izinsika zawo zamiswa phezu kwani na, loba ngubani owamisa ilitshe lawo lekhoneni na ⁷lapho izinkanyezi zokusa zazihlabelela kanyekanye lezingilosi zonke zamemeza ngentokozo?

⁸Ngubani owavalela ulwandle ngemva kwezivalo lapho selufohla esiswini na, ⁹lapho ngisenza amayezi aba yisembatho salo na ngalugoqela ngomnyama omkhulu, ¹⁰lapho ngalubekela imikhawulo ngamisa iminyango yalo lemigoqo endaweni yayo, ¹¹lapho engathi, ‘Ungeza uze ufike lapha kodwa ungedluli; kulapha amagagasi akho azigqajayo aphelela khona?’ ¹²Sewake wabekela ikuseni umthetho na, loba watshengisa ukusa indawo yakho ¹³ukuba kuphakamise umhlaba ngemiphetho kuthintithe ababi abakuwo?

¹⁴Umhlaba ubumbeka isimo njengebumba ufakwe uphawu; imibala yawo ikhanye ithi bha njengelembu. ¹⁵Ababi bayacitshelwa ukukhanya, lengalo yabo ephakanyisiweyo iyephulwa. ¹⁶Sewake wahamba emithonjeni yolwandle na loba wahamba ezingoxweni zenziki yalo na?

¹⁷Amasango okufa aseke abonakaliswa kuwe na? Usuke wawabona amasango ethunzi lokufa na? ¹⁸Ubuqedisisile na ubukhulu bobubanzi bomhlaba? Ngitshela nxa ukwazi konke lokhu. ¹⁹Yiphi indlela eya ekhaya elihlala ukukhanya na? Ubumnyama bona buhlala ngaphi?

²⁰Ungakusa ezindaweni zakho na? Uyazazi izindlela eziya emizini yazo na? ²¹Ye uyakwazi, ngoba wawuvele usuzelwe! Usuphile iminyaka yonke le! ²²Sewake wangena eziphaleni zikangqwaqwane loba wabona iziphala zesiqhotho na, ²³engizilindisele izikhathi zohlupho, insuku zempi lokuhlasela na?

²⁴Ingaphi indlela eya esigodlweni sokwaba umbane, loba indawo yokuhlakaza umoya wempumalanga phezu komhlaba na? ²⁵Ngubani ogubhe intshukuntshu yezihlambo zezulu, lendlela yomdumo wesiphepho; ²⁶ukuthelezela ilizwe elingahlali muntu, inkangala okungelamuntu kuyo, ²⁷ukusuthisa ilizwe elilugwadule kulenze lihlume utshani na?

²⁸Izulu elinayo liloyise na? Ngubani onguyise wamathonsi amazolo na? ²⁹Ngesikabani isisu esizala iliqhwa na? Ngubani ozala umtshazo ovela phezulu na ³⁰lapho amanzi abalukhuni njengelitshe, lapho iphezulu yolwandle ijiyile?

³¹Ungasibopha na isiLimela lesi esihle? Ungazithukulula yini izintambo zeziNja? ³²Ungawuletha na uMthala ngesikhathi sawo loba ukhuphe inkanyezi ethiwa yiNgulube lemidlwane yayo? ³³Uyayazi imithetho yasezulwini na? Ungawakha yini umbuso kaNkulunkulu emhlabeni?

³⁴Ungawamemeza yini amayezi uthi akunethise ngesihlambo samanzi? ³⁵Uyakuthuma yini ukuphazima kombane? Uyabika kuwe yini uthi, ‘Ngilapha’? ³⁶Ngubani owapha inhliziyo ukuhlakanipha kumbe owapha ingqondo ukuzwisisa na?

³⁷Ngubani ololwazi lokubala amayezi na? Ngubani ongagenqula amaqhaga asezulwini na ³⁸nxa uthuli seluqina lamagade omhlabathi esebumbene? ³⁹Uyasizingelela na isilwanekazi ukudla kwaso, uyiqede indlala yezilwane ⁴⁰lapho zilele ezikhundleni zazo kumbe zicwathile ezixukwini?

⁴¹Ngubani opha iwabayi ukudla lapho amatsiyane alo ekhala kuNkulunkulu ezulazula ehayila ngendlala na?”