Psaumes 97

Le Seigneur règne, que la terre se réjouisse

¹यहोवा ह सासन करथे, धरती ह खुस होवय; दूरिहा-दूरिहा के समुंदर-तटमन आनंद मनावंय। ²बादर अऊ गहिरा अंधियार ओकर चारों कोति हवय; धरमीपन अऊ नियाय ओकर सिंघासन के नीव अंय। ³आगी ह ओकर आघू-आघू जाथे अऊ ओकर बईरीमन ला चारों कोति ले भसम कर देथे। ⁴ओकर बिजली ह संसार ला अंजोर कर देथे; धरती ह येला देखके कांपथे। ⁵पहाड़मन यहोवा के आघू म याने कि जम्मो धरती के परभू के आघू म मोम के सहीं टघल जाथें। ⁶अकास ह ओकर धरमीपन के बखान करथे, अऊ जम्मो मनखेमन ओकर महिमा ला देखथें। ⁷ओ जम्मो, जऊन मन बेकार के देवतामन के अराधना करथें, अऊ जऊन मन मूरतीमन ऊपर घमंड करथें, ओमन लज्जा म पड़थें; हे जम्मो देवतामन, परमेसर के अराधना करव!

⁸हे यहोवा, तोर नियाय के बात ला सुनके सियोन ह आनंदित होथे अऊ यहूदा के गांवमन खुस होथें। ⁹काबरकि हे यहोवा, तेंह जम्मो धरती के ऊपर सर्वोच्च परमेसर अस; तेंह जम्मो देवतामन ले बहुंत ऊपर उठाय गे हस। ¹⁰जऊन मन यहोवा ले मया करथें, ओमन बुरई ले घिन करंय, काबरकि ओह अपन बिसवासयोग्य जन के परान के रकछा करथे अऊ ओमन ला दुस्टमन के हांथ ले बचाथे। ¹¹अंजोर ह धरमी ऊपर चमकथे अऊ ईमानदार मनखे के हिरदय म आनंद रहिथे। ¹²हे धरमी मनखेमन, यहोवा म आनंद मनावव, अऊ ओकर पबितर नांव के परसंसा करव।