Psaumes 26

Sonde-moi, Seigneur

¹दाऊद के भजन। हे यहोवा, मोला नियाय दे, काबरकि मेंह एक निरदोस जिनगी जीये हवंव; मेंह यहोवा ऊपर भरोसा करे हंव अऊ नइं डगमगाय हंव। ²हे यहोवा, मोला परख अऊ मोला जांच, मोर हिरदय अऊ मोर मन ला जांच ले; ³काबरकि तोर अटूट मया के खियाल मोर मन म हमेसा रहिथे अऊ मेंह तोर बिसवासयोग्यता के भरोसा म जीयत हंव। ⁴मेंह धोखेबाजमन के संग म नइं बईठंव, अऊ न ही पाखंडीमन के संगति करंव। ⁵मेंह गलत काम करइयामन के संगति ले घिन करथंव अऊ दुस्टमन के संग नइं बईठंव। ⁶हे यहोवा, मेंह अपन हांथ ला निरदोस रखथंव, अऊ तोर बेदी करा जाथंव, ⁷अऊ ऊंचहा अवाज म तोर परसंसा करथंव अऊ तोर जम्मो अद्भूत काममन ला बताथंव। ⁸हे यहोवा, मेंह ओ घर ले मया करथंव, जिहां तेंह रहिथस, ओ जगह जिहां तोर महिमा रहिथे।

⁹मोर परान ला पापीमन के संग अऊ मोर जिनगी ला खून के पीयासामन के संग झन ले, ¹⁰जेमन के हांथमन दुस्टता के उपाय करथें, अऊ जेमन के जेवनी हांथ ह घूसखोरी ले भरे हवय। ¹¹मेंह तो निरदोस जिनगी जीथंव; मोला छोंड़ा ले अऊ मोर ऊपर दया कर। ¹²मेंह समतल भुइयां म ठाढ़े हवंव; सभामन म मेंह यहोवा के इस्तुति करहूं।