Psaumes 138
Tu m'as répondu le jour où j'ai crié
1༼དཱ་བིད་ཀྱི་མགུར༌མ།༽ བདག་གིས་ཡིད་སེམས་ཧྲིལ་པོས་ཁྱེད་ལ༌བསྟོད། །ལྷ་རྣམས་ མདུན་དུ་ཁྱེད་ལ་བསྟོད་དབྱངས༌འབུལ།། 2ཁྱེད་ཀྱིས་ཉིད་ཀྱི་མཚན་དང་བཀའ་གསུང་ནི། །ཀུན་ལས་རབ་ཏུ་ཆེ་བར་མཛད་པས༌ན། །ཁྱེད་ཀྱི་མཆོད་ཁང་དམ་པར་ངས་ཕྱག༌འཚལ། །ཁྱེད་ཀྱི་བྱམས་བརྩེ་དང་ནི་དྲང་བདེན༌ཕྱིར། །ཁྱེད་ཀྱི་མཚན་ལ་གཏང་རག་འབུལ་བར༌བྱ།། 3བདག་གིས་ཞུས་ཚེ་ཁྱེད་ཀྱིས་བཀའ་ལན༌གནང༌། །སེམས་ཤུགས་སྤོབས་པ་ཁྱེད་ཀྱིས་བདག་ལ༌བསྩལ།། 4ཀྱེ་ཀྱེ་ཡ་ཝཱེ་ཁྱེད་ཀྱི་ཞལ་གདམས༌རྣམས། །ས་གཞིའི་རྒྱལ་པོ་ཀུན་གྱིས་ཐོས་ཡོད༌པས། །དེ་ཚོས་ཁྱེད་ལ་གཏང་རག་ཅིས་མི༌འབུལ།། 5ཡ་ཝཱེའི་གཟི་བརྗིད་རབ་ཏུ་ཆེ་བས༌ན། །ཉིད་ཀྱི་མཛད་པ་རྣམས་ཀྱི་གླུ་ཡང༌ལེན།། 6ཡ་ཝཱེ་ཁོང་ཉིད་བླ་མེད་ལགས་ན༌ཡང༌། །ཉམ་ཆུང་དག་ལ་ཁོང་གིས་གཟིགས་པར༌མཛད། །འོན་ཀྱང་ང་རྒྱལ་ཅན་དེ་རྒྱང་ནས༌མཁྱེན།། 7ང་རང་སྡུག་བསྔལ་ཁྲོད་ནས་འགྲོ་དུས༌སུ། །ཁྱེད་ཀྱིས་ང་ཡི་ཚེ་སྲོག་སྐྱོབ་པ༌དང༌། །ཕྱག་ཟུང་བརྐྱངས་ནས་དགྲ་བོའི་ཁོང་ཁྲོ༌འགོག །ཁྱེད་ཕྱག་གཡས་པས་ང་རང་སྐྱོབ་པར༌འགྱུར།། 8ཡ་ཝཱེས་ང་ཡི་དོན་ཀུན་བསྒྲུབ་པར༌འགྱུར། །ཡ་ཝཱེ་ཁྱེད་ཀྱི་བྱམས་བརྩེ་རྟག་ཏུ༌གནས། །ཁྱེད་ཀྱི་ཕྱག་ལས་རྣམས་ཀྱང་སྤོང་མ་མཛོད།།