Luc 23

Jésus devant Pilate

Gannaaw loolu mbooloo ma mépp jóg, daldi yóbbu Yeesu ca Pilaat. ²Ñu tàmbali di ko sosal, naan: «Kii lanu fekk muy fàbbi askan wi, di aaye ku fey Sesaar galag, te naan moom ci boppam mooy Almasi bi, di buur.» ³Pilaat laaj ko ne ko: «Yaw yaa di buurub Yawut yi?» Mu ne ko: «Yaa ko wax.»

⁴Pilaat ne sarxalkat yu mag ya ak mbooloo ma: «Waa jii, gisuma ci moom genn tooñ.» ⁵Teewul ñu gëna dëggal seeni wax, ne: «Mooy yékkati askan wi, ndax li muy jàngale ci mboolem réewum Yawut, dale ko ca Galile ba fii.»

Jésus devant Hérode

⁶Pilaat dégg loolu, daldi ne: «Waa jii waa Galile la?» ⁷Ba mu wóoree Pilaat ne, ca diiwaan ba ca kilifteefu Erodd la Yeesu bokk, ca la ko yónnee Erodd, yemook Erodd itam nekk Yerusalem ca fan yooya. ⁸Ba Erodd gisee Yeesu, bég na lool, ndax yàggoon na koo bëgga gis, ngir la mu déggoon ay mbiram, ba tax mu yaakaara teewe ay kéemaanam.

⁹Mu laaj ko lu bare, Yeesu tontuwu ko. ¹⁰Sarxalkat yu mag ya ak firikati yoonu Musaa yaa nga taxaw, di ko tuumaal ak doole. ¹¹Erodd aki dagam nag sewal Yeesu, di ko ñaawal. Gannaaw loolu mu solal ko mbubb mu yànj, delloo ko Pilaat.

¹²Erodd ak Pilaat, bésub keroog ay xarit lañu, doonte ay noon lañu woon.

La foule choisit Barabbas

¹³Ci kaw loolu Pilaat woo sarxalkat yu mag ya ak kilifa ya ak askan wa. ¹⁴Mu ne leen: «Yeena ma indil waa jii, ne ma mooy lajjal askan wi. Man nag laaj naa ko ci seen kanam, waaye gisuma ci moom genn tooñ ci li ngeen ko tuumaal. ¹⁵Erodd itam gisul lenn ci moom, ndax moo nu ko yónneewaat. Mu ngoog, waa jii deful lenn lu jar àtteb dee.

¹⁶Kon nag dama koy dóorlu, yiwi ko.» ¹⁷Ñépp daldi xaacoondoo, ne: «Reyal kii te yiwil nu Barabas!» ¹⁸Barabas nag ag fippu gu amoon ca dëkk ba, ak nit ku ñu fa bóomoon, moo waral ñu tëj ko kaso.

¹⁹Pilaat namma bàyyi Yeesu, daldi waxaat ak mbooloo ma. ²⁰Teewul ñuy xaacu, naan: «Daaj ko ci bant! Daaj ko ci bant!» ²¹Pilaat ne leen ñetteel bi yoon: «Ana lu bon lu kii def? Lenn lu jar dee, gisuma ko ci moom. Kon nag, dama koy dóorlu, yiwi ko.»

²²Ñu gënatee xaacu, di sàkku ñu daaj ko ci bant. Seen coow la mujj ko ëpp doole. ²³Ci kaw loolu Pilaat dogal ñu defal leen la ñu sàkku. ²⁴Mu yiwi ka ñu ko ñaanoon, te jëfi fippu ak nit ku ñu bóom taxoon ñu tëj ko kaso. Yeesu nag, mu teg ko ci seeni loxo, ngir ñu def ko lu leen neex.

²⁵Ba ñuy yóbbu Yeesu, jenn waay ju dëkk Siren, ñu di ko wax Simoŋ, moom lañu dajeel, mu jóge ca tool ya. Ñu gàdduloo ko bant ba ñuy daaje Yeesu, mu topp ca Yeesu.

Père, pardonne-leur

²⁶Nit ñu bare nag topp ko, jigéen ñay yuuxu, di ko jooy. ²⁷Yeesu geesu leen, ne: «Yeen jigéeni Yerusalem, buleen ma jooy! Jooyleen seen bopp ak seeni doom. ²⁸Ay jant a ngi ñëw kat, dees na ca ne: “Ndokkalee jigéen ju tëlee am doom, masula jur, masula nàmpal!” ²⁹Su boobaa, “Nit ñee naan tund yu mag yi: ‘Daanuleen ci sunu kaw!’, naan tund yu ndaw yi: ‘Suulleen nu!’” ³⁰Ndegam bant bu tooy lees di def nii, ana nu bant bu wow di mujje?»

³¹Yóbbaale nañu itam ñaari saay-saay, ngir boole leen ak Yeesu, rey leen. ³²Ba ñu agsee ca béreb, ba ñuy wax Kaaŋu bopp, fa lañu daaj Yeesu ci bant, daajaale ñaari saay-saay ya, kenn ca ndijooram, ka ca des ca càmmoñam. ³³Ci kaw loolu Yeesu ne: «Baay, baal leen, ndax li ñuy def, xamuñu ko.» Ñu daldi tegoo bant ay yéreem, ngir séddoo ko.

³⁴Mbooloo maa nga taxaw di seetaan, kilifa ya ñoom di ko kókkali, naan: «Moom day musle, na musal boppam nag, ndegam mooy Almasib Yàlla, ki Yàlla tànn!» ³⁵Takk-der ya it di ko ñaawal. Ñu dikk, tàllal ko bineegar, ngir mu naan. ³⁶Ñu ne ko: «Gannaaw yaa di buurub Yawut yi, musalal sa bopp!»

³⁷Ñu bindal ko nag fa ko tiim, mbind mii: «Kii mooy buurub Yawut yi.» ³⁸Kenn ca saay-saay ya ñu wékkoon ci bant, di ko saaga, naan ko: «Xanaa du yaw yaay Almasi bi? Wallul sa bopp te wallu nu!» ³⁹Moroom ma nag femmu ko, ne ko: «Ragaloo sax Yàlla, te yaa ngi ci menn mbugal mii?

⁴⁰Nun sax, lii jaadu na ci nun, ndax sunu yoolu jëf lanu jot. Waaye kii deful dara lu teggi yoon!» ⁴¹Mu teg ca ne: «Yeesu, boo délsee ci sa nguur, fàttaliku ma!» ⁴²Yeesu ne ko: «Yaw laa ne déy, bésub tey jii, man ngay nekkal fa Àjjana.»

⁴³Ba ñu demee ba tollu ci booru fukki waxtu ak ñaar ca bëccëg, ag lëndëm a wàcc ca réew ma mépp, ba fukki waxtu ak juróom ca ngoon.

Je remets mon esprit entre tes mains

⁴⁴Naka la jant bi giim, ridob biir néegu Yàlla ba xar ca digg ba. ⁴⁵Ci kaw loolu Yeesu àddu ca kaw, ne: «Baay, jébbal naa la samag noo!» Ba mu waxee loolu la dog. ⁴⁶Njiitu takk-der ba ko teewe woon nag sàbbaal Yàlla, ne: «Aylayéwén, waa jii ku jub la.»

⁴⁷Ba loolu amee mboolem ña fa daje woon di seetaan te teewe loolu, ñépp dellu seeni kër, tey fëgg seen dënn ndaxu tiis. ⁴⁸Mboolem xamey Yeesu, ak jigéen ña ko toppe woon ca Galile, ña nga dànd lu sore, di seetaan. ⁴⁹Ndeke jenn waay ju ñuy wax Yuusufa, ma nga bokkoon ca kuréelu àttekati Yawut ya. Ku baax, ku jub la woon.

L'ensevelissement de Jésus

⁵⁰Kooku ànduloon ca àtteb kuréel ga ak seen jëf jooju. Ma nga cosaanoo woon dëkkub Yawut ba ñuy wax Arimate, te moom itam, nguurug Yàlla la doon séentu. ⁵¹Moom moo dem ca Pilaat, sàkku ci moom, mu jox ko néewub Yeesu. ⁵²Gannaaw loolu mu wàccee ko ca bant ba, sànge ko càngaayal lẽe, denc ko ci bàmmeel bu ñu yatt ciw doj, te maseesu caa denc ab néew.

⁵³Bésub Waajal la woon, bésub Noflaay bi ci topp di waaja taxaw. ⁵⁴Fekk na jigéen ña dale woona ànd ak Yeesu ca Galile, ña nga topp ca Yuusufa. Ñu gis bàmmeel ba, ak na ñu ca dence néew ba. ⁵⁵Ba loolu amee ñu dellu, waajali cuuraay ak diwu xeeñlu ngir néew ba. Bésub Noflaay nag taxaw, ñu dallu, ni ko yoon santaanee.