Job 14

L'homme né de la femme

Lòm ki fèt de fanm gen vi kout ki plen traka. ²Tankou yon flè, li parèt e li fennen. Anplis, li sove ale kon lonbraj. Li pa dire. ³Èske Ou ouvri zye Ou sou li pou mennen li an jijman avèk Ou?

⁴Se kilès ki kab fè pwòp sa ki pa pwòp? Pèsòn! ⁵Konsi fòs jou li yo avèk Ou, fòs mwa li yo avèk Ou. Ou te etabli limit li ke li p ap kab depase. ⁶Retire zye Ou sou li pou l kab pran repo, jiskaske li kab konplete jou li yo, kon yon ouvriye jounalye.

⁷Gen espwa pou yon pyebwa lè l koupe, li kab boujonnen ankò, nouvo boujon yo kab reyisi. ⁸Malgre rasin li yo vin vye nan tè a, e chouk li mouri nan tè sèch, ⁹fè rive yon gout dlo, e li va pete pouse boujon yo kon yon plant.

¹⁰Men lòm mouri pou kouche plat. Lòm mouri e kibò li ye? ¹¹Tankou dlo lanmè fè vapè monte e rivyè a vin sèch, ¹²konsa lòm kouche, e li pa leve ankò. Jiskaske syèl yo vin disparèt, li p ap reveye, ni leve ankò.

¹³O ke ou ta kapab kache mwen nan sejou lanmò an, pou ou ta kapab fè m kache jiskaske chalè Ou retounen kote Ou! Ke Ou ta fikse yon limit pou mwen, e sonje m! ¹⁴Si yon nonm mouri, èske li va leve ankò? Pou tout jou a lit mwen yo, mwen ta tann jiskaske lè rive pou yo lage m. ¹⁵Ou ta rele e mwen ta reponn Ou; Konsa, Ou ta anvi anpil zèv men Ou yo.

¹⁶Paske koulye a, ou konte tout pa mwen fè yo. Èske Ou pa swiv peche m yo? ¹⁷Transgresyon mwen yo sele nèt nan yon sachè Konsa, Ou vlope tout inikite m yo. ¹⁸Men mòn nan kap tonbe pa mòso pa fè anyen; wòch la ap kite plas li.

¹⁹Dlo a epwize wòch yo, gran fòs li lave pousyè tè a. Se konsa Ou detwi espwa a lòm. ²⁰Ou vin fè l soumèt nèt pou tout tan, e li pati; Ou chanje aparans li, e voye l ale. ²¹Fis li yo vin resevwa lonè, men li menm pa konnen sa; oswa fis li yo vin pa anyen, men li pa apèsi sa.

²²Men kò l fè mal; epi li fè dèy sèlman pou pwòp tèt li.