Psaumes 3

Beaucoup se lèvent contre moi

Псальм Давіда, калі ён уцякаў ад аблічча Абсалома, сына свайго. ²ГОСПАДЗЕ, як шматлікія сталі прыгнятальнікі мае! Шмат іх паўстае супраць мяне! ³Шмат тых, якія кажуць пра душу маю: «Няма для яго збаўленьня ў Бога». (Сэлях) ⁴Але Ты, ГОСПАДЗЕ, — шчыт для мяне, Ты — слава мая, і Ты падымаеш галаву маю.

⁵Голасам маім я клікаў да ГОСПАДА, і Ён адказаў мне з гары Сваёй сьвятой. (Сэлях) ⁶Я лёг і заснуў, і абудзіўся, бо ГОСПАД падтрымлівае мяне. ⁷Не палохаюся я многіх тысячаў народу, што абступілі мяне наўкола.

⁸Паўстань, ГОСПАДЗЕ! Збаў мяне, Божа мой! Бо Ты даў ворагам маім па сківіцах, Ты скрышыў зубы бязбожнікаў. ⁹У ГОСПАДА збаўленьне і для народу Твайго дабраслаўленьне Тваё. (Сэлях)