Proverbes 21

Le coeur du roi est dans sa main

Сэрца валадара ў руцэ ГОСПАДА, як ручаі водаў; Ён скіроўвае яго, куды хоча. ²Усе шляхі чалавека слушныя ў вачах ягоных, але ГОСПАД узважвае сэрцы. ³Праведнасьць і суд даспадобы ГОСПАДУ больш, чым ахвяра.

⁴Узьнесеныя вочы і надзьмутае сэрца — ніва бязбожнікаў, [і гэта] грэх. ⁵Думкі руплівага [прыносяць] прыбытак, а кожны нецярплівы [будзе мець] нястачу. ⁶Зьбіраньне скарбаў языком падманлівым — пара, што зьнікае, і шуканьне сьмерці.

⁷Злачыннасьць бязбожнікаў зьвернецца на іх, бо яны грэбуюць чыніць суд [справядлівы]. ⁸Крывы шлях чалавека нягоднага, а справы чыстага — простыя. ⁹Лепей жыць у куце на даху, чым са сварліваю жонкаю ў прасторным доме.

¹⁰Душа бязбожніка жадае зла, ня знойдзе [ласкі] ў вачах ягоных бліжні яго. ¹¹Калі караюць насьмешніка, неразумны стаецца мудрэйшым, і калі мудрага вучаць, ён здабывае веданьне. ¹²Разважае праведнік пра дом бязбожніка, як гінуць бязбожнікі ў ліхоцьці сваім.

¹³Хто вушы свае затыкае на крык убогага, той сам будзе клікаць, але ня будзе адказу. ¹⁴Падарунак таемны тушыць гнеў, а гасьцінец у заўлоньне [спыняе] вялікую ярасьць. ¹⁵Правасудзьдзе — радасьць для праведніка і загуба для злачынцаў.

¹⁶Чалавек, які зьбіваецца са шляху розуму, супачыне ў грамадзе памёршых. ¹⁷Хто любіць весяліцца, будзе ў нястачы, а хто любіць віно і алей, ня будзе багатым. ¹⁸Выкупам за праведніка [будзе] бязбожнік, а [выкупам] за правага — ліхадзей.

¹⁹Лепш жыць у зямлі пустыннай, чым з жонкай гняўлівай і сварлівай. ²⁰Прывабныя скарбы і алей у жытле мудрага, а бязглузды чалавек змарнуе іх. ²¹Хто імкнецца да праведнасьці і міласэрнасьці, знойдзе жыцьцё, праведнасьць і славу.

²²Мудры ўвойдзе ў горад магутных і зрыне моц, у якой яны мелі пэўнасьць. ²³Хто захоўвае вусны свае і язык свой, захоўвае душу сваю ад бедаў. ²⁴Свавольны і дзёрзкі, называны блюзьнерам, робіць усё ў шале нахабства.

²⁵Жаданьне гультая заб’е яго, бо рукі ягоныя адмаўляюцца працаваць. ²⁶Кожны дзень ён жадае і прагне, а праведнік дае і не шкадуе. ²⁷Ахвяра бязбожнікаў — брыдота, тым больш [брыдотныя] тыя, якія складаюць яе з падступнасьцю.

²⁸Сьведка хлусьлівы згіне, а чалавек, які слухае, будзе гаварыць заўсёды. ²⁹Чалавек бязбожны ўпарты абліччам сваім, а правы разумее шлях свой. ³⁰Няма мудрасьці, і няма розуму, і няма рады насуперак ГОСПАДУ.

³¹Каня рыхтуюць на дзень бітвы, але перамога — ад ГОСПАДА.