Псалтирь 105

Вспоминайте чудеса Его

Pasalamati ninyo ang Ginoo; simbaha ninyo siya! Isugid sa mga katawhan ang iya mga binuhatan. ²Kantahi ninyo siya sang mga pagdayaw; isugid ang tanan nga makatilingala niya nga mga binuhatan. ³Dayawa ninyo ang iya pagkabalaan. Magkalipay kamo nga mga nagadangop sa iya.

⁴Magsalig kamo sa Ginoo kag sa iya nga kusog. Magdangop kamo permi sa iya. ⁵Kamo nga mga pinili sang Dios kag mga kaliwat ni Abraham nga alagad sang Dios, kag mga kaliwat man ni Jacob, dumduma ninyo ang iya makatilingala nga mga binuhatan, ang iya mga milagro, kag ang iya mga paghukom. ⁶Siya ang Ginoo nga aton Dios, kag nagahukom siya sa bilog nga kalibutan.

⁷Indi gid niya pagkalimtan ang iya kasugtanan hasta san-o, ang iya promisa hasta sa linibo ka henerasyon. ⁸Ini nga kasugtanan ginhimo niya kay Abraham kag ginpromisa man niya kay Isaac. ⁹Ginpadayon niya ini nga kasugtanan kay Jacob, kag magapadayon ini nga kasugtanan sa Israel hasta san-o.

¹⁰Kay siling niya, “Ihatag ko sa imo ang duta sang Canaan bilang palanublion ninyo.” ¹¹Sadto anay diutay pa lang kaayo ang katawhan sang Dios, kag mga pangayaw pa lang sila sa duta sang Canaan. ¹²Nagsaylo-saylo sila sa mga nasyon kag sa mga ginharian.

¹³Pero wala pagtuguti sang Dios nga daog-daugon sila sang iban. Para maproteksyunan sila, ginsabdong niya ang mga hari [nga nagkontra sa ila]. [Siling niya,] ¹⁴“Indi ninyo pag-anha ang akon pinili nga mga alagad; indi ninyo paghaliti ang akon mga propeta.” ¹⁵Nagpadala ang Dios sang gutom sa duta [sang Canaan]. Gin-ubos niya kuha ang tanan nila nga pagkaon.

¹⁶Pero ginpauna na niya si Jose [sa Egypt sa pagbulig sa ila]. Ginbaligya didto si Jose bilang isa ka ulipon. ¹⁷Ginkadenahan ang iya mga tiil kag ginbutangan sang salsalon ang iya liog, ¹⁸hasta nga natabo ang iya ginpropesiya. Ang mensahi sang Ginoo[sa iya nga natuman] nagpamatuod [nga matarong siya].

¹⁹Ginbuy-an siya sang hari [sang Egypt] nga nagadumala sa madamo nga katawhan, ²⁰kag ginhimo niya siya nga manugdumala sang iya palasyo kag sang tanan niya nga pagkabutang. ²¹Bilang manugdumala, may awtoridad siya sa pagdisiplina sa mga opisyal sang hari kag sa pagtudlo sa iya mga manuglaygay.

²²Sang ulihi nagkadto si Jacob [kag ang iya panimalay] sa Egypt, ang duta sang mga kaliwat ni Ham, kag didto sila nag-estar bilang mga pangayaw. ²³Ginpadamo sang Ginoo ang iya katawhan; mabudlay na sila pierdihon sang [mga taga-Egypt nga] ila mga kaaway. ²⁴Gintugutan sang Ginoo nga kontrahon kag tuntuhon sang mga taga-Egypt ang iya katawhan nga iya mga alagad.

²⁵Dayon ginpadala niya si Moises nga iya alagad kag si Aaron nga iya pinili. ²⁶Ginpakita nila didto sa duta sang mga kaliwat ni Ham ang mga milagro sang Dios. ²⁷Ginpadulom sang Dios ang Egypt; pero nagsupak gihapon ang mga taga-Egypt sa iya mga sugo.

²⁸Ginhimo niya nga dugo ang ila mga tubig, gani nagkalamatay ang mga isda. ²⁹Napuno sang paka ang ila duta, bisan ang mga kuwarto sang ila mga pangulo. ³⁰Sa pagmando sang Dios, napuno sang langaw kag lamok ang ila duta.

³¹Imbes ulan, yelo kag kilat ang ginpadala niya sa ila duta. ³²Ginpamierde niya ang ila mga tanom nga ubas kag ang mga kahoy nga higera, kag ang iban pa nga mga kahoy. ³³Sa iya pagmando, nag-abot ang mga apan nga indi maisip.

³⁴Kag ginpangaon sini ang tanan nga tanom sa ila duta pati na ang ila mga patubas. ³⁵Ginpamatay sang Dios ang tanan nila nga kamagulangan nga lalaki. ³⁶Dayon ginpaguwa niya ang mga Israelinhon sa Egypt nga wala maano, kag may dala pa sila nga mga pilak kag mga bulawan.

³⁷Nalipay ang mga taga-Egypt sa paghalin sang mga Israelinhon, tungod kay nahadlok sila sa ila. ³⁸[Sang paglakat sang mga Israelinhon,] nagbutang ang Dios sang panganod sa paghandong sa ila kag sang kalayo sa paghatag sang kasanag sa ila sa kagab-ihon. ³⁹Nagpangayo sila[sang pagkaon], kag ginpadal-an sila sang Dios sang mga pitaw, kag ginbusog niya sila sang pagkaon nga halin sa langit.

⁴⁰Ginbuka niya ang bato kag nagsagawak ang tubig. Nag-ilig ini sa desierto nga daw sa suba. ⁴¹[Ginhimo ini tanan sang Dios] kay wala niya ginkalimtan ang iya mismo promisa kay Abraham nga iya alagad. ⁴²Ginpaguwa niya [sa Egypt] ang katawhan nga iya ginpili, nga malipayon kag nagahinugyaw sa kalipay.

⁴³Kag ginhatag niya sa ila ang mga duta sang iban nga mga katawhan; ginpanubli nila ang ginpangabudlayan sang iban. ⁴⁴[Ginhimo ini sang Dios] para tumanon nila ang iya mga pagsulundan kag mga kasuguan. Dayawa ang Ginoo.