Псалтирь 98
Господь сотворил чудеса
1༼མགུར༌མ་ཞིག༽ ཡ་ཝཱེས་ངོ་མཚར་རྨད་བྱུང་དོན་རྣམས༌མཛད། །ཕྱག་གཡས་དང་ནི་དཔུང་ངར་དམ་པ༌ཡིས། །ཉིད་ཀྱི་ཕྱིར་དུ་ཐར་ལམ་མཛད་པས༌ན། །ཁོང་ལ་མགུར་གླུ་གསར་པ་འབུལ་བར༌གྱིས།། 2ཡ་ཝཱེས་ཉིད་ཀྱི་ཐར་པ་སྟོན་མཛད༌ཅིང༌། །མི་རིགས་ཀུན་གྱི་མཐོང་ངོར་དྲང་བདེན༌མངོན།། 3ཁོང་གིས་ཡེས་ར་ཨེལ་པར་བསྟན་པ༌ཡི། །བྱམས་བརྩེ་དང་ནི་དྲང་བདེན་ཐུགས་སུ༌དྲན། །ས་མཐའ་ཀུན་གྱིས་རང་ཅག་དཀོན་མཆོག༌གི །ཐར་པ་དེ་ནི་མཐོང་བར་འགྱུར་བ༌འོ།། 4ས་གཞི་ཡོངས་ཀྱིས་ཡ་ཝཱེར་དགའ་འབོད༌བྱེད། །སྐད་གསང་མཐོན་པོས་དགའ་སྤྲོའི་བསྟོད་དབྱངས༌འབུལ།། 5པི་ཝང་དང་བཅས་ཡ་ཝཱེར་བསྟོད་དབྱངས༌ཕུལ། །པི་ཝང་གླུ་སྐད་བཅས་ཀྱིས་ཁོང་ལ༌བསྟོད།། 6དུང་དང་རྭ་དུང་གཉིས་ཀྱི་སྐད་སྒྲ༌ཡིས། །རྒྱལ་ཆེན་ཡ་ཝཱེའི་དྲུང་དུ་དགའ་འབོད༌བྱེད།། 7རྒྱ་མཚོ་དང་ནི་དེའི་ནང་ཡོད་པ༌དང༌། །འཇིག་རྟེན་དང་ནི་དེ་རུ་ཆགས་པ༌སོགས། །ཀུན་གྱིས་ང་རོའི་སྐད་སྒྲ་བསྒྲག་གྱུར༌ཅིག། 8གཙང་པོ་རྣམས་ཀྱིས་ཐལ་མོ་བརྡབ་པ༌དང༌། །རི་བོ་རྣམས་ཀྱིས་ལྷན་ཅིག་དགའ་འབོད༌གྱིས།།
9ཀུན་གྱིས་ཡ་ཝཱེའི་དྲུང་དུ་དགའ་འབོད༌གྱིས། །ས་གཞིར་ཁྲིམས་ཐག་གཅོད་དུ་ཁོང་ཕེབས༌ཡོང༌། །འཇིག་རྟེན་ལ་ནི་དྲང་པོའི་དཔྱད་ཁྲ༌གཏོང༌། །མི་སྡེ་རྣམས་ལ་ཁྲིམས་གཅོད་དྲང་གཞག༌མཛད།།