Псалтирь 108

Буду славить Тебя между народами

¹༼དཱ་བིད་ཀྱི་གསུང་མགུར་ཏེ་མགུར་མ༌ཞིག༽ ཀྱེ་ཀྱེ་དཀོན་མཆོག་ངའི་སེམས་བརྟན་པོར༌གནས། །ཡིད་སེམས་ཀུན་ནས་གླུ་ལེན་བསྟོད་དབྱངས༌བྱ།། ²ཀྱེ་མ་རྒྱུད་མངས་པི་ཝང་སད་པར་གྱིས། །བདག་གིས་སྐྱ་རེངས་གཉིད་ལས་བསླང་བར༌བྱ།། ³ཀྱེ་ཀྱེ་ཡ་ཝཱེ་མི་རིགས་ཀུན་གྱི༌ཁྲོད། །ང་ཡིས་ཁྱེད་ལ་གཏང་རག་འབུལ་བར༌བྱ། །མི་རྣམས་དབུས་སུ་ཁྱེད་ལ༌བསྟོད་དབྱངས༌འབུལ།། ⁴ཁྱེད་ཀྱི་བྱམས་བརྩེ་ཆེན་པོ་གནམ་ལས༌མཐོ། །ཁྱེད་ཀྱི་དྲང་བདེན་ནམ་མཁའི་སྤྲིན་དང་མཉམ།། ⁵ཀྱེ་ཀྱེ་དཀོན་མཆོག་ཁྱེད་ཉིད་ནམ་མཁའ་ལས། །བླ་ན་འཕགས་ཤིང་ཁྱེད་ཀྱི་གཟི་བརྗིད་ཀྱང་། །ས་གཞིའི་སྟེང་ལ་ཡོངས་སུ་ཁྱབ་གྱུར་ཅིག། ⁶ཁྱེད་ཀྱིས་གཅེས་པའི་མི་རྣམས་ཐར་བའི༌ཕྱིར། །ཕྱག་གཡས་ང་རང་སྐྱོབ་ཅིང་བཀའ་ལན༌གནོངས།། ⁷གནས་ཀྱི་མཆོག་ནས་དཀོན་མཆོག་འདི་སྐད༌གསུངས། །བདག་གིས་རྒྱལ་ཁ་དང་བཅས་སི་ཀེམ༌བགོ །སོའུ་ཀོད་ལུང་པའི་ཚད་ཀྱང་འཇལ་བར༌བྱ།། ⁸གིལ་ཨད་དང་ནི་མཱ་ན་ཤེ་ངའི༌ཡིན། །ཨེ་ཕཱར་ཡིམ་ནི་བདག་གི་རྨོག་ཞྭ༌ཡིན། །ཡ་ཧུ་དཱ་ནི་ང་ཡི་སྲིད་འཁར་ཡིན།།

⁹མོ་ཨབ་བདག་གི་ཁྲུས་གཞོང་ཡིན་པ༌དང༌། །ཨེ་དོམ་ཕྱོགས་སུ་བདག་གིས་བསིལ་ལྷམ༌གཡུག །ཕེ་ལེ་ཤེད་པར་རྒྱལ་ཁའི་ཀི་སྒྲ་སྒྲོག། ¹⁰གྲོང་ཁྱེར་བརྟན་པོར་ང་རང་སུ་ཡིས༌བསྐྱལ། །ཨེ་དོམ་ཡུལ་དུ་ང་རང་སུ་ཡིས༌འཁྲིད།། ¹¹དཀོན་མཆོག་ཁྱེད་ཀྱིས་ངེད་རྣམས་མ་སྤངས༌སམ། །ཀྱེ་ཀྱེ་དཀོན་མཆོག་ཁྱེད་ཉིད་ངེད་ཅག༌གི །དམག་དཔུང་མཉམ་དུ་གཤེགས་པ་མ་ཡིན༌ནམ།། ¹²མི་ཡི་རོགས་སྐྱོར་ཕན་མེད་ཡིན་པས༌ན། །དགྲ་བོ་འགོག་ཕྱིར་ང་ཚོར་རོགས་རམ༌མཛོད།། ¹³དཀོན་མཆོག་ཁོང་གིས་དགྲ་རྣམས་བརྫི་འོང༌བས། །ཁོང་ལ་བརྟེན་ནས་ང་ཚོས་དཔའ་རྩལ༌ངོམ།།