Иов 34

Бог не может творить неправду

א                  ויען אליהוא ויאמר ²ב  שמעו חכמים מלי    וידעים האזינו לי ³ג  כי-אזן מלין תבחן    וחך יטעם לאכל ⁴ד  משפט נבחרה-לנו    נדעה בינינו מה-טוב ⁵ה  כי-אמר איוב צדקתי    ואל הסיר משפטי ⁶ו  על-משפטי אכזב    אנוש חצי בלי-פשע ⁷ז  מי-גבר כאיוב    ישתה-לעג כמים ⁸ח  וארח לחברה עם-פעלי און    וללכת עם-אנשי-רשע

⁹ט  כי-אמר לא יסכן-גבר--    ברצתו עם-אלהים ¹⁰י  לכן אנשי לבב--    שמעו-לי חללה לאל מרשע    ושדי מעול ¹¹יא  כי פעל אדם ישלם-לו    וכארח איש ימצאנו ¹²יב  אף-אמנם אל לא-ירשיע    ושדי לא-יעות משפט ¹³יג  מי-פקד עליו ארצה    ומי שם תבל כלה ¹⁴יד  אם-ישים אליו לבו    רוחו ונשמתו אליו יאסף ¹⁵טו  יגוע כל-בשר יחד    ואדם על-עפר ישוב ¹⁶טז  ואם-בינה שמעה-זאת    האזינה לקול מלי

¹⁷יז  האף שונא משפט יחבוש    ואם-צדיק כביר תרשיע ¹⁸יח  האמר למלך בליעל--    רשע אל-נדיבים ¹⁹יט  אשר לא-נשא פני שרים    ולא נכר-שוע לפני-דל כי-מעשה ידיו    כלם ²⁰כ  רגע ימתו--    וחצות לילה יגעשו עם ויעברו    ויסירו אביר לא ביד ²¹כא  כי-עיניו על-דרכי-איש    וכל-צעדיו יראה ²²כב  אין-חשך ואין צלמות--    להסתר שם פעלי און ²³כג  כי לא על-איש ישים עוד--    להלך אל-אל במשפט ²⁴כד  ירע כבירים לא-חקר    ויעמד אחרים תחתם

²⁵כה  לכן--יכיר מעבדיהם    והפך לילה וידכאו ²⁶כו  תחת-רשעים ספקם--    במקום ראים ²⁷כז  אשר על-כן סרו מאחריו    וכל-דרכיו לא השכילו ²⁸כח  להביא עליו צעקת-דל    וצעקת עניים ישמע ²⁹כט  והוא ישקט ומי ירשע--    ויסתר פנים ומי ישורנו ועל-גוי ועל-אדם    יחד ³⁰ל  ממלך אדם חנף--    ממקשי עם ³¹לא  כי-אל-אל האמר נשאתי--    לא אחבל ³²לב  בלעדי אחזה אתה הרני    אם-עול פעלתי לא אסיף

³³לג  המעמך ישלמנה כי-מאסת--כי-אתה תבחר ולא-אני    ומה-ידעת דבר ³⁴לד  אנשי לבב יאמרו לי    וגבר חכם שמע לי ³⁵לה  איוב לא-בדעת ידבר    ודבריו לא בהשכיל ³⁶לו  אבי--יבחן איוב עד-נצח    על-תשבת באנשי-און ³⁷לז  כי יסיף על-חטאתו פשע בינינו יספוק    וירב אמריו לאל