Salmi 108

Ti loderò tra i popoli

Awit ni David. O Dios, nagsalig gayod ako kanimo. Awitan ka nako ug mga pagdayeg sa tibuok kong kasing-kasing. ²Momata ako samtang nagbanag-banag pa, ug andamon ko ang akong mga instrumento nga adunay mga kuwerdas sa pagdayeg kanimo. ³Ginoo, dayegon ka nako taliwala sa kanasoran. Awitan ka nako taliwala sa mga katawhan.

⁴Kay ang imong gugma ug pagkamatinumanon dili gayod masukod; mas taas pa kini sa kalangitan. ⁵Ipakita, O Dios, ang imong pagkagamhanan diha sa kalangitan ug sa tibuok kalibotan. ⁶Luwasa kami pinaagi sa imong gahom. Tubaga ang among mga pag-ampo aron maluwas kami nga imong mga hinigugma.

⁷O Dios, miingon ka didto sa imong balaang puloy-anan, “Modaog ako. Bahin-bahinon ko ang Sekem ug ang Walog sa Sucot, ug ipanghatag sa akong katawhan. ⁸Akoa ang Gilead ingon man ang Manases. Ang Efraim mao ang akong tigpanalipod ug ang Juda mao ang akong tigdumala. ⁹Ang Moab akong sulugoon ug ang Edom akong gipanag-iyahan. Mosinggit ako sa kadaogan batok sa Filistia.” ¹⁰Kinsa ang modala kanako sa Edom ug sa siyudad niini nga nalibotan sa mga paril?

¹¹Dili ba ikaw, O Dios, nga nagsalikway kanamo ug wala na mouban sa among mga sundalo? ¹²Tabangi kami batok sa among mga kaaway, kay walay pulos ang tabang sa tawo. ¹³Modaog kami pinaagi sa imong tabang, O Dios, kay laglagon mo ang among mga kaaway.