列王纪下 8

书念妇人收回田产

¹जऊन माईलोगन के बेटा ला एलीसा ह जिलाय रिहिस, ओकर ले ओह कहे रिहिस, “अपन परिवार के संग इहां ले जाके कुछू समय तक जिहां कहीं तेंह रह सकत हस, उहां रह, काबरकि यहोवा के ईछा हवय कि ये देस म अकाल पड़ही, अऊ ओ अकाल ह सात बरस तक बने रहिही।” ²परमेसर के जन के कहे बचन के मुताबिक ओ माईलोगन ह करिस। ओह अपन परिवार के संग उहां ले चल दीस अऊ ओमन पलिस्तीमन के देस म जाके सात बरस तक रिहिन। ³सात साल के आखिरी म, ओह पलिस्तीमन के देस ले लहुंट आईस अऊ अपन घर अऊ जमीन ला वापिस पाय बर राजा करा बिनती करे बर गीस। ⁴ओ बेरा राजा ह परमेसर के जन के सेवक गेहजी ले गोठियावत रिहिस, अऊ ओह कहत रिहिस, “जऊन बड़े-बड़े काम एलीसा ह करे हवय, ओ जम्मो के बारे म मोला बता।” ⁵जब गेहजी ह राजा ला बतात रिहिस कि एलीसा ह कइसे एक मुरदा ला जिलाईस, त ओहीच बेरा म, ओ माईलोगन ह जेकर बेटा ला एलीसा ह जिलाय रिहिस, राजा करा अपन घर अऊ जमीन ला वापिस करे के बिनती लेके आईस। ओला देखके गेहजी ह कहिस, “हे मोर मालिक, हे राजा, येह ओही माईलोगन अऊ येह ओकर बेटा ए, जेला एलीसा ह जिलाय रिहिस।” ⁶राजा ह ओ माईलोगन ले येकर बारे म पुछिस, त ओह जम्मो बात ला बताईस। तब राजा ह ओ माईलोगन के मामला बर एक अधिकारी ला ठहिराके ओला कहिस, “जऊन कुछू ये माईलोगन के रिहिस, ओ जम्मो चीज येला लहुंटा दिये जावय अऊ जऊन दिन ले येह देस छोंड़के गे रिहिस, तब ले लेके आज तक येकर जमीन के जतकी आमदनी होय हवय, ओ जम्मो ला घलो येला दे दिये जावय।”

哈薛谋害便哈达

⁷एलीसा ह दमिस्क ला गीस, अऊ अराम के राजा बेन-हदद ह बेमार रिहिस। जब राजा ला ये बताय गीस, “परमेसर के जन ह इहां आय हवय।” ⁸त ओह हजाएल ला कहिस, “अपन संग एक भेंट लेके परमेसर के जन करा जा, अऊ ओकर जरिये यहोवा के ईछा के पता लगा; ओकर ले पुछ, ‘का मेंह ये बेमारी ले ठीक होहूं?’ ” ⁹तब हजाएल ह अपन संग दमिस्क ले भेंट के रूप म सबले उत्तम चीजमन ला चालीस ठन ऊंट म लदवाके एलीसा ले मिले बर गीस। ओह एलीसा के आघू म ठाढ़ होके कहिस, “तोर बेटा अराम के राजा बेन-हदद ह मोला तोर ले ये पुछे बर पठोय हवय, ‘का मेंह ये बेमारी ले ठीक होहूं?’ ” ¹⁰एलीसा ह जबाब दीस, “जाके ओला बता, ‘तेंह जरूर ठीक हो जाबे।’ तभो ले यहोवा ह मोर ऊपर ये परगट करे हवय कि ओह निसंदेह मर जाही।” ¹¹अऊ ओह ओकर कोति टकटकी लगाके देखते रिहिस, जब तक कि हजाएल ह परेसान नइं हो गीस। तब परमेसर के जन ह रोवन लगिस। ¹²तब हजाएल ह पुछिस, “मोर परभू ह काबर रोवत हे?” ओह जबाब दीस, “काबरकि जऊन हानि तेंह इसरायलीमन के करबे, ओला मेंह जानत हंव। तेंह ओमन के गढ़वाले जगहमन म आगी लगा देबे; ओमन के जवानमन ला तलवार ले मार डारबे; ओमन के छोटे लइकामन ला भुइयां म पटक देबे, अऊ ओमन के गरभवती माईलोगनमन के पेट ला फार देबे।” ¹³हजाएल ह कहिस, “तोर सेवक जऊन ह एक कुकुर सहीं अय, ओह का ए कि अइसन बड़े काम करय?” एलीसा ह जबाब दीस, “यहोवा ह मोर ऊपर ये परगट करे हवय कि तेंह अराम के राजा बन जाबे।” ¹⁴तब हजाएल ह एलीसा ले बिदा होके अपन मालिक करा लहुंट आईस। जब बेन-हदद ह ओकर ले पुछिस, “एलीसा ह तोर ले का कहिस?” त हजाएल ह जबाब दीस, “ओह मोला बताईस कि तेंह जरूर ठीक हो जाबे।”

¹⁵पर ओकर दूसर दिन हजाएल ह एक मोटा कपड़ा लेके पानी म भिजोईस, अऊ ओला राजा के मुहूं म अइसने ओढ़हा दीस कि राजा ह मर गीस। तब हजाएल ह ओकर जगह म राजा बनिस।

约兰作犹大王

¹⁶इसरायल के राजा अहाब के बेटा योराम के राज के पांचवां बछर म, जब यहूदा के राजा यहोसापात ह जिंदा रिहिस, तब यहोसापात के बेटा यहोराम ह यहूदा म राजा के रूप म राज करन लगिस। ¹⁷जब ओह राजा बनिस, तब ओह बत्तीस साल के रिहिस, अऊ ओह आठ साल तक यरूसलेम म राज करिस। ¹⁸ओह इसरायल के राजामन के रसता म चलिस, जइसने कि अहाब के घराना ह करे रिहिस, काबरकि ओह अहाब के एक बेटी ले बिहाव करे रिहिस। ओह यहोवा के नजर म दुस्ट काम करिस। ¹⁹पर यहोवा ह अपन सेवक दाऊद के कारन यहूदा ला नास करे नइं चाहत रिहिस। ओह वायदा करे रिहिस कि ओह दाऊद अऊ ओकर संतानमन बर एक दीया हमेसा बनाय रखही।

以东与立拿背叛

²⁰यहोराम के समय म, एदोम ह यहूदा के बिरूध बिदरोह करिस अऊ अपन खुद के एक राजा बना लीस। ²¹एकरसेति यहोराम ह अपन जम्मो रथमन ला लेके साईर ला चले गीस। एदोमीमन ओला अऊ ओकर रथ के सेनापतिमन ला घेर लीन, पर रथिया उठके ओह निकल गीस; पर ओकर सेना ह वापिस घर भाग गीस। ²²आज तक ले एदोम ह यहूदा के बिरूध बिदरोह करत रहिथे। ओही बेरा लिबना ह घलो बिदरोह कर दीस। ²³यहोराम के राज के आने घटनामन, अऊ ओकर जम्मो काम के बारे म यहूदा के राजामन के इतिहास के किताब म लिखे गे हवय। ²⁴यहोराम ह अपन पुरखामन के संग हमेसा बर सुत गीस अऊ ओमन के बीच दाऊद के सहर म ओला माटी देय गीस। अऊ ओकर जगह म ओकर बेटा अहजयाह ह राजा बनिस।

亚哈谢作犹大王

²⁵अहाब के बेटा इसरायल के राजा योराम के राज के बारहवां साल म, यहूदा के राजा यहोराम के बेटा अहजयाह ह राज करन लगिस। ²⁶जब अहजयाह ह राजा बनिस, तब ओह बाईस साल के रिहिस, अऊ ओह यरूसलेम म एक साल तक राज करिस। ओकर दाई के नांव अतलयाह रिहिस, जऊन ह इसरायल के राजा ओमरी के पोती रिहिस। ²⁷अहजयाह ह अहाब के घराना के रसता म चलिस अऊ यहोवा के नजर म दुस्ट काम करिस, जइसे कि अहाब के घराना ह करे रिहिस, काबरकि ओह अहाब के परिवार के दामाद रिहिस। ²⁸अहजयाह ह अहाब के बेटा योराम के संग रामोत-गिलाद सहर म अराम के राजा हजाएल के बिरूध लड़ई करे बर गीस। अरामीमन योराम ला घायल कर दीन; ²⁹एकरसेति राजा योराम ह ओ घावमन ले ठीक होय बर यिजरेल लहुंट गीस, जेमन ओला अरामीमन के दुवारा रामोत म अराम के राजा हजाएल के संग लड़ई करत बेरा लगे रिहिन। तब यहूदा के राजा यहोराम के बेटा अहजयाह ह अहाब के बेटा योराम ला देखे बर यिजरेल गीस, काबरकि योराम ह घायल हो गे रिहिस।