诗篇 19

诸天述说神的荣耀

¹༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ནམ་མཁའི་མཐོངས་ཀྱིས་དཀོན་མཆོག་གཟི་དཔལ༌མངོན། །ཨ་སྔོན་དབྱིངས་ཀྱིས་ཁོང་གི་མཛད་པ༌སྒྲོག། ²ཉིན་རེ་བཞིན་དུ་ངག་ནས་གཏམ་གླེང༌ཞིང༌། །མཚན་མོ་རེ་ལ་ཤེས་བྱ་སྤེལ་བ༌ཡིན།། ³སྐད་ཆ་དང་ནི་ཚིག་གི་སྦྱོར་བ༌མེད། །མི་ཡིས་དེ་རྣམས་སྐད་སྒྲ་མི་ཐོས༌ཀྱང༌།། ⁴དེ་ཚོའི་སྐད་གདངས་གནམ་འོག་ཀུན་ཏུ༌ཁྱབ། །དེ་ཚོའི་སྨྲ་བརྗོད་ས་མཐའི་བར་དུ༌སླེབས། །ཁོང་གིས་དེའི་ནང་ཉི་མར་གུར་ཞིག༌ཕུབ།། ⁵མག་གསར་བཞིན་དུ་ཉི་མ་གཟིམས་ལས་ཐོན། །དཔའ་རྒོད་དགའ་སྤྲོས་ལམ་ལ་རྒྱུག་དང༌མཚུངས།། ⁶དེ་ནི་ནམ་མཁའི་ཕྱོགས་གཅིག་ནས་འཆར༌ཞིང་། །བསྐོར་ནས་ནམ་མཁའི་ཕྱོགས་གཞན་དུ་སླེབ༌བོ། །དེ་ཡི་ཚ་དྲོད་ལས་ནི་བསྐུངས་པ༌མེད།། ⁷ཡ་ཝཱེའི་བཀའ་ཁྲིམས་ཁྱད་དུ་འཕགས་པ༌ལགས། །དེས་ནི་མི་ཡི་དྲན་པ་གསོ་བ༌ཡིན། །ཡ་ཝཱེའི་དཔང་ཡིག་བློ་གཏད་ཁེལ་བ༌ཡིན། །དེས་ནི་གླེན་པ་མཁས་པར་མཛད་པ༌འོ།། ⁸ཡ་ཝཱེའི་བཀའ་སློབ་དྲང་པོ་ཡིན་པ༌དང༌། །དེས་ནི་མི་ཡི་སེམས་ལ་དགའ་སྤྲོ༌གནང༌། །ཡ་ཝཱེའི་བཀའ་ནི་དྭངས་ཤིང་གཙང་བ༌ཡིན། །དེས་ནི་མི་ཡི་མིག་ལ་འོད་མདངས༌སྦྱིན།།

⁹ཡ་ཝཱེར་གུས་ཤིང་འཇིགས་པ་རྣམ་དག༌ཡིན། །དེ་ནི་རྒྱུན་ནས་རྒྱུན་དུ་གནས་པར༌འགྱུར། །ཡ་ཝཱེའི་སྒྲིག་སྲོལ་བདེན་ཞིང་ཡོངས་སུ༌དྲང༌།། ¹⁰དེ་རྣམས་གསེར་ལས་རིན་ཐང་ཆེ་བ༌སྟེ། །ལྷད་མེད་གསེར་རྐྱང་མོད་པོ་ལས་ཀྱང༌ལྷག །དེ་རྣམས་སྦྲང་རྩི་ལས་ཀྱང་མངར་བ༌སྟེ། །སྦྲང་བུའི་ཚང་གི་སྦྲང་རྩི་ལས་ཀྱང༌མངར།། ¹¹ཁྱེད་ཀྱི་ཞབས་ཕྱིར་དེ་ལས་དྲན་སྐུལ༌ཐོབ། །དེ་རྣམས་སྲུང་བར་རྔན་པ་ཆེན་པོ༌ཡོད།། ¹²རང་སྐྱོན་རང་གིས་རྟོགས་པ་སུ་ཡོད༌དམ། །མངོན་མེད་ཉེས་སྐྱོན་རྣམས་ལ་གུ་ཡངས༌མཛོད།། ¹³གང་བྱུང་སྤྱོད་པའི་སྡིག་ཉེས་མི་བསག༌ཆེད། །ཁྱེད་ཀྱིས་ཉིད་ཀྱི་ཞབས་ཕྱི་བསྲུང་བར༌མཛོད། །ང་རང་དེ་རྣམས་དབང་དུ་འགྲོར་མི༌བྱ། །དེ་ནས་ང་རང་སྐྱོན་དང་བྲལ་བ༌དང༌། །སྡིག་པ་ཆེན་པོ་ལས་ནི་ཐར་བར༌འགྱུར།། ¹⁴ཡ་ཝཱེ་ང་ཡི་བྲག་རྡོ་སྲོག་སྐྱོབ༌ལགས། །བདག་གི་སྨྲ་སྒོའི་གཏམ་དང་སེམས་ཀྱི༌བློ། །ཁྱེད་ཀྱི་དྲུང་དུ་ཐུགས་སུ་འབབ་པར༌ཤོག།