诗篇 81

你要大大张口，我就给你充满

Кіраўніку хору: на лад Гітыт. Асафа. ²Весяліцеся перад Богам моцы нашай; радасна гукайце Богу Якуба! ³Пачніце сьпяваньне, вазьміце бубны, гусьлі мілагучныя і псалтыр.

⁴Дзьміце ў трубу ў маладзік, у поўню, у дзень сьвята нашага, ⁵бо гэткая пастанова ў Ізраілі, закон Бога Якубавага. ⁶Ён паставіў гэта на сьведчаньне для Язэпа, калі выводзіў з зямлі Эгіпецкай, і мы пачулі мову, якой ня ведалі: ⁷«Я прыбраў цяжар з плячэй ягоных, рукі ягоныя вольныя ад кашоў.

⁸У бядзе ты паклікаў Мяне, і Я выратаваў цябе; адказаў табе з-за заслоны грымотаў, выспрабаваў цябе пры водах Мэрывы. (Сэлях) ⁹Слухай, народзе Мой! Я буду сьведчыць супраць цябе, Ізраіль. Каб ты паслухаў Мяне, ¹⁰і не было ў цябе бога чужога, і не пакланяўся ты богу чужынцаў!

¹¹Я — ГОСПАД, Бог твой, Які вывеў цябе з зямлі Эгіпецкай! Расчыні шырока вусны твае, і Я напоўню іх. ¹²Але народ Мой не паслухаў голасу Майго, і Ізраіль ня быў паслухмяны Мне. ¹³Дык Я пакінуў іх у закамянеласьці сэрца іхняга, і яны хадзілі паводле намераў сваіх.

¹⁴О, калі б народ Мой паслухаў Мяне, калі б Ізраіль хадзіў шляхамі Маімі, ¹⁵Я б неўзабаве ўпакорыў ворагаў іхніх, і супраць прыгнятальнікаў іхніх павярнулася б рука Мая. ¹⁶Тыя, што ГОСПАДА ненавідзяць, падпарадкаваліся б ім, а шчасьце іхняе трывала б на вякі.

¹⁷І Я карміў бы іх з тлустасьці пшаніцы, мёдам са скалы насычаў бы іх».