诗篇 72

公义君王的治理

Для Салямона. Божа, дай суд Твой валадару, і праведнасьць Тваю — сыну валадара. ²Няхай судзіць ён народ Твой у праведнасьці, і ўбогіх Тваіх — у правасудзьдзі. ³Няхай прынясуць горы супакой народу, і ўзгоркі — праведнасьць.

⁴Няхай ён судзіць убогіх з народу, выбаўляе сыноў беднякоў і скрышыць прыгнятальнікаў. ⁵Няхай баяцца Цябе пакуль будзе сонца і перад абліччам месяца з пакаленьня ў пакаленьне. ⁶Няхай ён зыходзіць, як дождж на атаву, як кроплі дажджу, што зямля ад іх вільгатнее.

⁷Няхай закрасуе праведнік у дні ягоныя, і будзе мноства супакою, аж пакуль месяц стаіць. ⁸І няхай ён мае ўладу ад мора да мора і ад ракі аж да краю зямлі. ⁹Перад абліччам ягоным упадуць жыхары пустыні, і ворагі ягоныя будуць лізаць пыл.

¹⁰Валадары Таршышу і астравоў дары яму панясуць; валадары Шэвы і Сэвы прынясуць яму даніну. ¹¹І паклоняцца яму ўсе валадары, усе народы будуць служыць яму. ¹²Бо ён ратуе беднага, калі той галосіць, і прыгнечанага, і таго, у каго няма дапамогі.

¹³Ён літуецца над гаротным і бедным і выбаўляе душы бедакоў. ¹⁴Ад ашуканства і гвалту вызваляе душы іхнія, і ў вачах ягоных кроў іхняя вельмі каштоўная. ¹⁵І будзе ён жыць, і даваць яму будуць золата Шэвы, і будуць маліцца за яго заўсёды, і будуць дабраслаўляць яго ўсе дні.

¹⁶І будзе дастатак збожжа на зямлі, на вяршынях гор; будуць шумець, як Лібан, каласы ягоныя, і мяшчане заквітнеюць, як трава на зямлі. ¹⁷І будзе імя ягонае на вякі, перад абліччам сонца будзе трываць імя ягонае, і будуць дабраслаўлёныя ў ім усе народы, і будуць шчасьлівыя ў ім. ¹⁸Дабраслаўлёны ГОСПАД Бог, Бог Ізраіля, Які Сам робіць цуды.

¹⁹І дабраслаўлёнае імя славы Ягонай на вякі, і няхай напоўніцца славай Ягонай уся зямля! Амэн, амэн! ²⁰Канец малітвы Давіда, сына Есэя.