Salmi 89
Canterò per sempre le bontà del Signore
He Makiri nā Ētana Eterahi. Ka waiatatia e ahau ngā mahi tohu a Ihowā ake ake; ka whakapuakina e tōku māngai tōu pono ki ngā whakatupuranga katoa. 2I mea hoki ahau, “Ka hangā ake te mahi tohu mō ake tonu atu; ka whakapūmautia e koe tōu pono ki ngā tino rangi rā anō. 3“Kua whakarite kawenata ahau ki tāku i whiriwhiri ai; kua oati ki tāku pononga ki a Rāwiri; 4‘Ka pūmau i ahau ōu uri ake ake; ka hangā tōu torōna ki ngā whakatupuranga katoa.’ ” Hera 5Ka whakamoemiti anō ngā rangi, e Ihowā, ki āu mahi whakamīharo, ki tōu pono hoki i roto i te whakaminenga o te hunga tapu.
6Ko wai oti i ngā rangi hei rite mō Ihowā? Ko wai i roto i ngā tama a te hunga nunui e rite ana ki a Ihowā, 7he Atua whakamataku rawa i roto i te whakaminenga o te hunga tapu, e wehingia ana i runga ake i a rātou katoa i tētahi taha, i tētahi taha ōna? 8E Ihowā, e te Atua o ngā mano ko wai te mea kaha hei rite mōu, e IHA? Hei rite rānei mō tōu pono i tētahi taha ōu, i tētahi taha?
9Ko koe te kīngi o te huamo o te moana; ka oho ōna ngaru, ko koe hei whakamarino. 10Mongamonga noa i a koe a Rahapa ānō he tangata i patua; marara ana i a koe, i tōu ringa kaha ōu hoariri. 11Nāu ngā rangi, nāu te whenua; te ao me ōna mea e hua ana i runga nāu ēnā i pūmau ai.
12Ko te raki me te tonga nāu ēnā i hanga; ka hari a Taporo rāua ko Heremona ki tōu ingoa. 13He tākakau mārohirohi tōu; he pakari tōu ringa, rewa tonu tōu matau ki runga. 14Ko te tika me te whakawā te tūranga o tōu torōna; e haere ana te mahi tohu me te pono i mua i tōu aroaro.
15Ka hari te iwi e mōhio ana ki te tangi whakahari; e haere ana rātou, e Ihowā, i te mārama o tōu mata; 16e hari ana rātou ki tōu ingoa i te roa o te rā; ā, mā tōu tika ka kake ai rātou. 17Ko koe hoki te korōria o tō rātou kaha; mā tāu manako anō ka ara ai tō mātou haona.
18Nā Ihowā hoki tō mātou whakangungu rākau; ā, nā te Mea Tapu o Īharaira tō tātou kīngi. 19I kōrero moemoeā koe i reira ki tāu Mea Tapu, i mea: “Kua hoatu e ahau he kaha ki runga ki tētahi mārohirohi; kua whakanuia e ahau tētahi i whiriwhiria i roto i te iwi. 20Kua kitea e ahau tāku pononga, a Rāwiri; kua whakawahia ia e ahau ki tāku hinu tapu.
21Ka ū atu tōku ringa hei āwhina mōna; mā tōku tākakau anō ia e whakakaha. 22E kore te hoariri e whai wāhi ki a ia; e kore anō hoki te tama a te kino e tūkino i a ia. 23Māku e tukituki ōna hoariri ki tōna aroaro; ka whiua e ahau te hunga e kino ana ki a ia.
24Otirā, ka mau ki a ia tōku pono me tāku mahi tohu; ā, mā tōku ingoa ka ara ai tōna haona. 25Māku anō tōna ringa ka pā ai ki te moana; tōna matau ki ngā awa. 26Ka karanga ia ki ahau, ‘Ko koe tōku Pāpā, tōku Atua, te kōhatu o tōku whakaoranga.’ 27Ka waiho anō ia hei mātāmua māku ki runga ake i ngā kīngi o te whenua.
28Ka rongoātia e ahau tāku mahi i tohu mōna ake tonu atu; ka mau tonu tāku kawenata ki a ia. 29Ka meinga hoki e ahau ōna uri kia mau tonu ake ake, tōna torōna ānō ko ngā rā o te rangi. 30“Ki te whakarērea e āna tamariki tāku ture, ā, kāhore e haere i āku whakaritenga; 31ki te takahi rātou i āku tikanga; ā, kāhore e pupuri i āku whakahau; 32kātahi ka whāia tā rātou mahi tutū e tāku rākau, ō rātou kino e te whiu.
33Otirā, e kore e tangohia rawatia e ahau tāku mahi tohu i a ia, e tuku rānei i tōku pono kia hē. 34E kore tāku kawenata e takahia e ahau, e kore anō e whakarerekētia te mea i puta i ōku ngutu. 35Kotahi āku oatitanga i tōku tapu; e kore ahau e teka ki a Rāwiri.
36Ka mau tonu tōna uri ake ake; ā, ka rite tōna torōna ki te rā i tōku aroaro. 37Ka rite tōna pūmau ki tō te marama ake ake; hei kaiwhakaatu pono anō i runga i te rangi.” Hera 38Nā, kua panga nei koe, kua whakarihariha, kua riri ki tāu i whakawahi ai.
39Kua weriweri koe ki te kawenata ki tāu pononga; kua whakanoaia e koe tōna karauna, taka noa ki te whenua. 40Kua pākaruhia e koe ōna taiepa katoa; whakamōtītia iho e koe ōna pā kaha. 41E pāhua ana i a ia ngā tāngata katoa e tika ana i te ara; he tāwainga ia nā ōna hoa tata.
42Kua whakarewaina e koe te ringa matau o ōna hoa whawhai; kua meinga e koe kia hari ōna hoa whawhai katoa. 43Āe, e ngore ana i a koe te mata o tāna hoari; kīhai anō koe i tautoko i a ia ki te tatauranga. 44Kua whakamutua e koe tōna korōria, kua makā tōna torōna ki raro ki te whenua.
45Kua poroa e koe ngā rā o tōna taitamarikitanga; kua hīpokina ia e koe ki te whakamā. Hera 46Kia pēhea te roa, e Ihowā, e whakangaro ai koe i a koe, ake tonu atu? Kia pēhea te roa e toro ana tōu riri ānō he ahi? 47Kia mahara ki te poto rawa o tōku tāima; he aha i hangā ai e koe ngā tāngata katoa hei kore noa iho?
48Ko wai tēnā tangata e ora nei, ā, e kore e kite i te mate? E mawhiti koia i a ia tōna wairua i te kaha o te rēinga? Hera 49E te Ariki, kei hea āu arohatanga ō mua i oatitia ai e koe ki a Rāwiri i runga i tōu pono? 50Maharatia, e te Ariki, te tāwai ki āu pononga; e mau nei ki tōku uma te tāwai a ngā iwi nunui katoa; 51te tāwai a ōu hoariri, e Ihowā, tā rātou tāwai nei ki ngā hīkoinga o tāu i whakawahi ai.
52Kia whakapaingia a Ihowā ake ake. Āmine, āe Āmine.