Salmi 50

Dio, il giudice, parla

He hīmene nā Āhapa. Kua puaki te kupu a te Atua, a te Atua tonu, a Ihowā, ā, karangatia ana e ia te whenua i te putanga mai o te rā, tae noa ki tōna torengitanga. ²Kua tīaho mai te Atua i roto i Hiona, i te tino o te ātaahua. ³Ka haere mai tō tātou Atua, e kore anō e wahangū; ka kai te kāpura i tōna aroaro, ā, ka hūkerikeri te āwhā ki tētahi taha ōna, ki tētahi taha.

⁴Ka karangatia e ia ngā rangi i runga, me te whenua hoki, ki te whakaritenga mō tōna iwi. ⁵“Huihuia mai ki ahau tāku hunga tapu, te hunga i whakarite kawenata ki ahau i runga i te patunga tapu.” ⁶Ā, mā ngā rangi e whakakite tōna tika; ko te Atua ake nei hoki te kaiwhakawā. Hera ⁷“Whakarongo, e tōku iwi, ā, ka kōrero ahau; e Īharaira, ka whakaatu ahau ki a koe; ko ahau te Atua, ko tōu Atua.

⁸E kore ahau e riri ki a koe mō āu patunga tapu; ā, kei tōku aroaro tonu āu tahunga tinana. ⁹E kore ahau e tango i tētahi pūru i roto i tōu whare, i ētahi koati toa rānei i roto i āu taiepa. ¹⁰Nāku nei hoki ngā kīrehe katoa o te ngahere, ngā kararehe i runga i te mano o ngā pukepuke.

¹¹E mātau ana ahau ki ngā manu katoa o ngā maunga; nāku anō ngā kīrehe o te pārae. ¹²“Me he matekai tōku, e kore ahau e kōrero ki a koe; nāku nei hoki te ao, me ōna tini mea. ¹³E kai koia ahau i te kikokiko o ngā pūru, e inu rānei i te toto o ngā koati?

¹⁴Ko te whakawhetai hei patunga tapu māu ki te Atua; whakamanā hoki āu kupu taurangi ki te Runga Rawa. ¹⁵Ā, karanga ki ahau i te rā o te hē; māku koe e whakaora, ā, ka whakakorōriatia ahau e koe.” ¹⁶Ki te tangata hara ia ka mea te Atua: “He aha māu te whakapuaki i āku tikanga, te whakahua rānei i tāku kawenata e tōu māngai?

¹⁷Kua kino nei hoki koe ki te ako, ā, e ākiri ana i āku kupu ki muri i a koe. ¹⁸I tōu kitenga i te tāhae, nā, whakaae ana koe ki a ia; ā, whai tahi ana me te hunga pūremu. ¹⁹“Kua tukua e koe tōu māngai ki te kino; ā, e tito hīanga ana tōu arero.

²⁰Noho ana koe, ka kōrero kino ki tōu teina; ngautuarā tonu iho koe ki te tama a tōu whaea. ²¹Ko āu mahi ēnei, ā, wahangū tonu ahau; i mea koe he pēnā pū ahau me koe. Otirā, ka rīria koe e ahau, ka whakarārangitia anō aua mea ki tōu aroaro. ²²“Nā, whakaaroa tēnei, e te hunga kua wareware ki te Atua; kei haehaea koutou e ahau, ā, kāhore he kaiwhakaora.

²³Ko te whakamoemiti te patunga tapu e whai korōria ai ahau; ko te tangata hoki he tika nei tōna ara ka whakakitea e ahau ki a ia te whakaoranga a te Atua.”