Salmi 107

Lo dicano i riscattati dal Signore

Whakawhetai ki a Ihowā, he pai hoki ia; he pūmau tonu hoki tāna mahi tohu. ²Kia pēnā anō te kōrero a te hunga i hokona e Ihowā, i hokona nei e ia i roto i te ringa o te hoariri; ³i kohikohia nei i ngā whenua, i te rāwhiti, i te uru, i te raki, i te tonga.

⁴I hāereere rātou i te koraha i te wāhi mokemoke, tē kitea tētahi pā hei nohoanga. ⁵I matekai rātou, i matewai; hemo noa tō rātou wairua i roto i a rātou. ⁶Nā, ka tangi rātou ki a Ihowā i tō rātou pōuri; ā, whakaorangia ana rātou e ia i ō rātou mate; ⁷ā, ārahina ana e ia rā te ara tika; kia haere ai ki te pā hei nohoanga.

⁸Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! ⁹E whakamākonatia ana hoki e ia te wairua hiahia; ko te wairua hiakai, whakakīia ana e ia ki te pai. ¹⁰Ko te hunga i noho i te pōuri, i te ātārangi o te mate, he mea here ki te mamae, ki te rino; ¹¹mō rātou i tutū ki ngā kupu a te Atua, i whakahāwea ki te whakaaro o te Runga Rawa.

¹²Koia i pēhia iho ai e ia ō rātou ngākau ki te mahi; hinga iho rātou, kāhore hoki he kaiāwhina. ¹³Nā, ka tangi rātou ki a Ihowā i tō rātou pōuri; ā, ka whakaorangia rātou e ia i ō rātou mate. ¹⁴Whakaputaina mai ana rātou e ia i te pōuri, i te ātārangi o te mate; motumotuhia ana ō rātou here.

¹⁵Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! ¹⁶Kua tukitukia hoki e ia ngā tatau parāhi; kua tapahia e ia ngā tūtaki rino, motu rawa. ¹⁷Ko ngā kūware, nā ā rātou mahi tutū, nā ō rātou kino, i pākia ai rātou.

¹⁸Ka wetiweti tō rātou wairua ki ngā kai katoa, ā, ka whakatata rātou ki ngā kūwaha o te mate. ¹⁹Nā, ka tangi ki a Ihowā i tō rātou pōuri, ā, ka whakaorangia rātou e ia i ō rātou mate. ²⁰Tukua mai ana e ia tāna kupu, ā, rongoātia ana rātou; ā, whakaputaina ana rātou i ō rātou ngaromanga.

²¹Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata. ²²Kia tukua anō e rātou te whakahere, arā te whakamoemiti; kia whakapuaki i āna mahi i runga i te hari. ²³Ko te hunga e haere ana ki raro, ki te moana, i runga kaipuke, ā, e whai mahi ana i ngā wai nunui, ²⁴ko rātou e kite i ngā mahi a Ihowā, i āna mahi whakamīharo i te rire.

²⁵Puta kau tāna kupu, kua maranga te tūpuhi, māna e whakatūtū ōna ngaru. ²⁶Ka kake rātou ki runga ki te rangi, ka heke anō ki raro ki te rire; ngohe noa ō rātou wairua i te pāwera; ²⁷ka tiu rātou, ka hūrorirori ānō he tangata e haurangi ana; ā, kāhore he mahara i toe.

²⁸Heoi, ka tangi ki a Ihowā i tō rātou hēmanawa; ā, whakaorangia ana rātou i ō rātou mate. ²⁹Meinga ana e ia te tūpuhi kia marino, ōna ngaru kia māriri. ³⁰Nā, ka koa rātou, nō te mea ka mārie, ā, ka kawea rātou e ia ki te tauranga i hiahia ai rātou.

³¹Auē! Me i whakapaingia e te tangata a Ihowā mō tōna atawhai, mō āna mahi whakamīharo ki ngā tama a te tangata! ³²Kia whakanui hoki rātou i a ia i roto i te whakaminenga o te iwi, kia whakamoemiti ki a ia i roto i te nohoanga kaumātua. ³³Ko ia hei mea i ngā awa hei koraha, i ngā pupūtanga wai hei oneone maroke, ³⁴i te whenua whai hua, kia tītōhea, mō te hara o te hunga e noho ana i reira.

³⁵Ko ia hei mea i te koraha hei hārotoroto wai, i te whenua maroke hei pupūtanga wai. ³⁶Ā, whakanohoia iho e ia te hunga matekai ki reira, hanga ai i tētahi pā hei nohoanga; ³⁷hei rui māra, hei whakatō māra wāina, e tupu ai, e maha ai ngā hua.

³⁸Ko ia anō hei manaaki i a rātou, nō ka nui rawa; kāhore hoki e tukua kia torutoru haere ā rātou kararehe. ³⁹Nā, kua iti haere anō rātou, kua piko i te tūkino, i te hē, i te pōuri, ⁴⁰e ringihia ana e ia te whakahāwea ki runga ki ngā rangatira; e meinga ana kia hēhē i te ururua, i te wāhi kāhore nei he ara; ⁴¹otirā, kei te whakateitei ia i te rawakore ki runga i te mamae, kei te mea i ōna hapū kia rite ki te kāhui hipi.

⁴²Ka kite ngā tāngata tika, ā, ka hari; ko ngā hē katoa hoki, kopia ake te māngai. ⁴³Ko te tangata whakaaro nui ka mahara ki ēnei mea, ā, ka mōhio rātou ki te aroha o Ihowā.