Salmi 101

Camminerò con cuore integro

He hīmene nā Rāwiri. Ka waiatatia e ahau te mahi tohu me te whakawā tika; ka hīmene atu ahau ki a koe, e Ihowā. ²Ka āta whakahaere ahau i ahau i runga i te ara tika. Āhea koe haere mai ai ki ahau? Ka hāereere ahau i roto i tōku whare i runga i te ngākau tapatahi. ³E kore te mea tūtūā e waiho e ahau i mua i ōku kanohi. E kino ana ahau ki te mahi a te hunga peka kē; e kore e piri ki ahau.

⁴Ka mawehe atu i ahau te ngākau parori kē; e kore ahau e mōhio ki te mea kino. ⁵Ko te tangata e ngautuarā puku ana ki tōna hoa ka whakangaromia e ahau. E kore ahau e aro ki te tangata kanohi whakakake, ki te tangata ngākau whakapakari. ⁶Kei runga i ngā mea pono o te whenua ōku kanohi, kia noho ai rātou ki ahau; ko te tangata e haere ana i te ara tika, ka mahi tēnā ki ahau.

⁷E kore e noho ki tōku whare te kaimahi i te hīanga; e kore e tū ki tōku aroaro te tangata kōrero teka. ⁸I tēnei ata, i tēnei ata, ka whakangaromia e ahau ngā tāngata kikino katoa o te whenua; kia hātepea atu ai i te pā o te Atua te hunga katoa e mahi ana i te kino.