Osea 5

Il giudizio su sacerdoti e re

“Whakarongo ki tēnei, e ngā tohunga! Mahara mai, e te whare o Īharaira! Kia whai taringa mai hoki, e te whare o te kīngi! Mō koutou hoki te whakawā; nō te mea kua waiho koutou hei rore ki Mihipa, hei kupenga horahora ki runga ki Taporo, ²ā, hōhonu ana te hounga o te patu a te hunga tutū; ko ahau ia te kairiri i te hē ō rātou katoa. ³“E mōhio ana ahau ki a Ēparaima, kāhore a Īharaira e ngaro i ahau; kei te moepuku nei hoki koe ināianei, e Ēparaima, kua poke a Īharaira.

⁴E kore hoki rātou e tukua e ā rātou mahi kia hoki ki tō rātou Atua. Kei roto hoki i a rātou te wairua moepuku, kāhore ō rātou mōhio ki a Ihowā. ⁵“E whakaaturia ana tā Īharaira e tōna whakapehapeha ki tōna aroaro anō. Nā, ka hinga a Īharaira rāua ko Ēparaima i runga i tō rāua hē, me Hūrā, ka hinga ngātahi rātou. ⁶Ka haere rātou me ā rātou hipi, me ā rātou kau, ki te rapu i a Ihowā. Heoi, e kore e kitea; kua mawehe atu ia i roto i a rātou.

⁷Kua tinihanga rātou ki a Ihowā; he tamariki tangata kē hoki ā rātou tamariki. Ākuanei ka pau rātou me ā rātou wāhi i te marama kōhiti. ⁸“Whakatangihia te koronete ki Kipea, te tētere ki Rama; whakatangihia he whakaoho ki Peteawene; i muri i a koe, e Pineamine. ⁹Ka ururua a Ēparaima i te rā e rīria ai te hē; takoto rawa te mea kua whakaaturia nei e ahau i roto i ngā hapū o Īharaira.

¹⁰E rite ana ngā rangatira o Hūrā ki te hunga e whakaneke atu ana i te rohe; ka tāhoroa e ahau tōku riri ki runga ki a rātou ānō he wai. ¹¹“E tūkinotia ana, e whakapetia ana a Ēparaima i te whakawākanga, mōna i pai ki te whai i te whakahau. ¹²Nā reira, ka rite tāku ki a Ēparaima ki tā te pūrehurehu, ka rite hoki ki te pirau tāku ki te whare o Hūrā.

¹³“I te wā i kite ai a Ēparaima i tōna mate, a Hūrā hoki i tōna marūtanga. Nā, haere ana a Ēparaima ki Ahiria, tuku tāngata ana ia ki a Kīngi Iarepe. Heoi, e kore koutou e taea e ia te rongoā, e kore hoki e ora i a ia tō koutou marūtanga. ¹⁴Ka rite hoki tāku ki a Ēparaima ki tā te raiona, tāku ki te whare o Hūrā ka rite ki tā te kūao raiona. Ka haehae ahau, inā, ahau anō, ā, ka haere; ka maua atu e ahau, ā, kāhore he kaiwhakaora. ¹⁵Ka haere ahau ka hoki ki tōku wāhi, kia whakaae rā anō rātou ki tō rātou hē, kia rapua rā anō tōku mata e rātou. Ā, i a rātou e mate ana, kaha tonu tā rātou rapu i ahau.”