Giobbe 28

Dove si trova la sapienza

Dhugumaan iddoon meetiin keessaa qotamu, lafti warqeen itti baafamee qulqulleeffamu jira. ²Sibiilli lafa keessaa baafama; sibiilli diimaan immoo dhagaa albuudaa irraa baqfama. ³Namni hamma dhuma dukkanaatti deema; moggaa akka malee fagoo dhaqees, dukkana hamaa keessa dhagaa albuudaa barbaada.

⁴Inni lafa namoonni jiraatan irraa fagaatee iddoo miilli namaa ejjetee hin beeknetti boolla qota; namoota irraa fagaatee ni rarraʼa; asii fi achis ni raafama. ⁵Lafa irraa garuu nyaatatu argama; jala isheetiin immoo akka waan ibidda taateetti geeddaramti; ⁶dhagaan isaa burqaa sanpeerii ti; biyyoon isaas warqee qaba.

⁷Allaattiin tokko iyyuu karaa dhokfame sana hin beeku; iji culullees karaa sana hin argine. ⁸Bineensonni sodaachisoon irra hin ejjenne; leencis karaa sana hin darbine. ⁹Harki namaa dhagaa jabaa cabsa; hundee tulluuwwanii immoo ni gaggaragalcha.

¹⁰Inni kattaa keessaan karaa baasa; iji isaas waan gatii guddaa hunda arga. ¹¹Madda lageenii ni sakattaʼa; waan dhokfames ifatti ni baasa. ¹²Ogummaan garuu eessaa argamti? Hubannaanis eessa jiraata?

¹³Namni gatii isaa hin beeku; inni biyya jiraattotaa keessatti hin argamu. ¹⁴Tujubni, “Inni na keessa hin jiru” jedha; galaannis, “Inni na bira hin jiru” jedha. ¹⁵Warqeen qulqulluun isa bituu hin dandaʼu; gatiin isaas meetiidhaan hin madaalamu.

¹⁶Warqee Oofiiriitti, dhagaa gatii guddaa sardooniksiitti yookaan sanpeeriitti hin tilmaamamu. ¹⁷Warqee fi dhagaan akka bilillee calaqqisu ittiin hin qixxaatu; inni faaya warqee qulqulluutiin hin geeddaramu. ¹⁸Elellaanii fi dooqni akka waan gatii qabaniitti hin hedaman; gatiin ogummaa lula diimaa caala.

¹⁹Tophaaziyooniin Itoophiyaa itti qixxaatu; warqee qulqulluudhaanis bitamuu hin dandaʼu. ²⁰Yoos ogummaan eessaa dhufti ree? Hubannaanis eessa jiraatti? ²¹Isheen ija uumama hundaa jalaa dhokatteerti; simbirroota samii jalaas baddeerti.

²²Badiisnii fi Duuti, “Nu oduu ishee qofa gurra keenyaan dhageenye” jedhu. ²³Waaqa qofatu daandii gara ishee geessu hubatee, lafa inni jiraatus beeka; ²⁴inni handaara lafaa ni ilaala; waan samii jala jiru hunda ni argaatii.

²⁵Inni yommuu bubbeedhaaf humna kennee bishaanota safaretti, ²⁶yommuu bokkaadhaaf seera dhaabee bakakkaaf immoo daandii baasetti, ²⁷inni ogummaa ilaalee madaale; jabeessee dhaabee ishee qorate.

²⁸Ergasii ilmaan namaatiin, “Gooftaa sodaachuun ogummaa; waan hamaa irraa fagaachuunis hubannaa dha” jedhe.