Salmi 147

Egli conta il numero delle stelle

Dumisani uThixo. Kuhle kangakanani ukuhlabela indumiso kuNkulunkulu wethu, kumnandi njalo kufanele ukumbonga! ²UThixo uyalakha iJerusalema; aqoqe labo abahlakazekileyo baka-Israyeli. ³Uyabathoba abadabukileyo enhliziyweni abophe amanxeba abo.

⁴Umisile ubunengi bezinkanyezi aziqambe leyo laleyo ngamabizo. ⁵INkosi yethu inkulu, njalo makhulu amandla ayo; ukuzwisisa kwayo kakulamkhawulo. ⁶UThixo uyabasekela abathobekileyo kodwa abaphosele phansi ababi.

⁷Hlabelani kuThixo ngokubonga; litshaye amachacho kuNkulunkulu wethu. ⁸Uyembesa umkhathi ngamayezi; awuphe umhlaba izulu njalo akhulise utshani ezintabeni. ⁹Unika inkomo utshani aphe lamatsiyane amawabayi nxa esekhala.

¹⁰Ukuthokoza kwakhe kakukho emandleni ebhiza, loba injabulo yakhe ekuqineni kwemilenze yomuntu; ¹¹UThixo uthokoza ngalabo abamesabayo, ababeka ithemba labo ethandweni lwakhe olungaphuthiyo. ¹²Umbabaze uThixo, Oh Jerusalema; dumisa uNkulunkulu wakho, Oh Ziyoni.

¹³Ngoba uyaqinisa imigoqo yamasango akho, abusise labantu bakho ngaphakathi kwakho. ¹⁴Wenza ukuthula emikhawulweni yelizwe lakho. Njalo ukusuthisa ngamabele amahle kakhulu. ¹⁵Uthumela umlayo wakhe emhlabeni; ilizwi lakhe ligijima masinyane.

¹⁶Wendlala ungqwaqwane njengoboya bezimvu ahaze iliqhwa njengomlotha. ¹⁷Uphosela phansi isiqhotho sakhe njengamatshe. Ngubani ongamelana lomfutho wakhe olomqando na? ¹⁸Uthumela ilizwi lakhe konke kuncibilike; aphephethise umoya wakhe amanzi ageleze.

¹⁹Ulivezile ilizwi lakhe kuJakhobe, imithetho yakhe lezahlulelo ku-Israyeli. ²⁰Lokhu kazange akwenzele esinye isizwe; kaziyazi imithetho yakhe. Dumisani uThixo.