Salmi 143

Insegnami a fare la tua volontà

Zaburi mar Daudi. Winj lamona, yaye Jehova Nyasaye, chik iti ne ywakna mar kech; bi mondo ikonya nikech in ja-adiera kendo itimo maber. ²Kik imi jatichni yud kum nimar onge kata ngʼato achiel matimo maber e nyimi. ³Jasigu lawa matek, oserodha piny nyaka e lowo; ochuna ni nyaka adag kama otimo mudho mana ka joma notho chon gi lala.

⁴Omiyo chunya chandore e iya, ee, chunya obwok. ⁵Aparo higni machon mosekalo; aketo pacha mos kuom tijeni duto, kendo ageno gik ma lweti osetimo. ⁶Ayaroni lwetena; chunya gombi mana kaka lowo motwo gombo koth. Sela ⁷Dwoka piyo, yaye Jehova Nyasaye, nimar chunya ool. Kik ipandna wangʼi nono to dipoka achalo gi joma ridore e bur matut.

⁸Mi mondo okinyi oromna gi herani ma ok rem, nimar aketo genona kuomi. Nyisa yo monego alu nimar aketo chunya duto kuomi. ⁹Resa e lwet wasika, yaye Jehova Nyasaye, nimar in e jaritna. ¹⁰Puonja timo dwaroni, nimar in e Nyasacha; mi mondo Roho mari maber, otelna e yo mopie.

¹¹Yaye Jehova Nyasaye, kony ngimana nikech nyingi iwuon; gola oko e chandruok nikech timni maber. ¹²Mi wasika olingʼ thi, nikech herani ma ok rem; tiek joma kedo koda duto nimar an jatichni.