Salmi 56

In Dio confido, non temerò

¹संगीत निरदेसक बर। दूरिहा के बांज रूख म बईठे पंड़की के एक धुन। दाऊद के एक मिकताम। जब पलिस्तीमन दाऊद ला गत म पकड़ ले रिहिन। हे मोर परमेसर, मोर ऊपर दया कर, काबरकि मोर बईरीमन बहुंत पीछा करत हें; दिन भर ओमन अपन हमला करे के दबाव बनाथें। ²मोर बिरोधीमन दिन भर मोर पीछा करथें; अपन घमंड म बहुंते झन मोर ऊपर हमला करत हें। ³जब मेंह डर जाथंव, त मेंह तोर ऊपर अपन भरोसा रखथंव। ⁴परमेसर ऊपर, जेकर बचन के मेंह परसंसा करथंव— परमेसर ऊपर मेंह भरोसा रखथंव अऊ मेंह नइं डरंव। मरनहार मनखे ह मोर का कर सकत हे?

⁵दिन भर ओमन मोर बचन ला तोड़थें-मरोड़थें; ओमन के जम्मो उपाय मोला बरबाद करे बर रहिथे। ⁶ओमन सडयंत्र करथें, ओमन घात म लगे रहिथें, ओमन मोर अवई-जवई ऊपर ये आसा म नजर गड़ाय रहिथें, कि ओमन मोर परान ले सकंय। ⁷ओमन के दुस्टता के कारन, ओमन ला बचके झन जावन दे; हे परमेसर, अपन कोरोध म, ये मनखेमन ला गिरा दे। ⁸मोर दुरगति ला लिख ले; मोर आंसूमन ला अपन कुप्पी म रख ले— का ओमन तोर अभिलेख म नइं लिखे गे हवंय?

⁹जब मेंह मदद बर पुकारहूं त ओमन लहुंटके भागहीं। येकर दुवारा जानहूं कि परमेसर ह मोर कोति हवय। ¹⁰परमेसर ऊपर, जेकर बचन के मेंह परसंसा करथंव, यहोवा ऊपर, जेकर बचन के मेंह परसंसा करथंव— ¹¹ओही परमेसर ऊपर, मेंह भरोसा रखथंव अऊ मेंह नइं डरंव। मनखे ह मोर का कर सकथे?

¹²हे मोर परमेसर, मेंह तोर बर सपथ खाय हंव; मेंह तोला धनबाद-बलिदान चघाहूं। ¹³काबरकि तेंह मोला मिरतू ले अऊ मोर गोड़मन ला ठोकर खाय ले बचाय हस, ताकि मेंह जिनगी के अंजोर म परमेसर के आघू म चल सकंव।