Salmi 21

Il re si rallegra della tua forza

¹संगीत के निरदेसक बर दाऊद के एक भजन। हे यहोवा, राजा ह तोर सामर्थ म आनंदित होथे। तोर दिये गे बिजय म ओला बहुंत आनंद मिलथे! ²तेंह ओकर हिरदय के ईछा ला पूरा करे हस अऊ ओकर मुहूं के बिनती ला अस्वीकार नइं करे हस। ³तेंह उत्तम आसीस के संग ओकर ले मिले बर आय अऊ ओकर मुड़ म सुध सोन के मुकुट पहिराय हस। ⁴ओह तोर ले जिनगी मांगिस, अऊ तेंह ओला जिनगी देय— तेंह ओकर जिनगी ला सदाकाल बर बढ़ाय। ⁵जऊन जय तेंह ओला दे हस, ओकर महिमा ह बड़े ए; तेंह ओला सोभा अऊ महिमा दे हस। ⁶सही म तेंह ओला खतम नइं होवइया आसीस दे हस अऊ अपन उपस्थिति के आनंद ले ओला खुस कर दे हस। ⁷काबरकि राजा ह यहोवा ऊपर भरोसा करथे; सर्वोच्च परमेसर के बड़े मया के कारन ओह अटल बने रहिही। ⁸तोर हांथ ह तोर जम्मो बईरीमन के ऊपर पड़ही; तोर जेवनी हांथ ह तोर बईरीमन ला धर लीही।

⁹जब तेंह लड़ई करे बर परगट होबे, त तेंह ओमन ला बरत भट्ठी म बारे सहीं बार देबे। यहोवा ह अपन कोप म ओमन ला लील जाही, अऊ ओकर आगी ह ओमन ला भसम कर दीही। ¹⁰तेंह ओमन के संतानमन ला धरती ले नास कर देबे, मानव-जाति ले ओमन के बंस ला मिटा देबे। ¹¹हालाकि ओमन तोर बिरूध सडयंत्र रचथें अऊ दुस्ट योजना बनाथें, पर ओमन सफल नइं होवंय। ¹²जब तेंह अपन धनुस ले ओमन ला अपन निसाना बनाबे। त ओमन अपन पीठ देखाके भागहीं। ¹³हे यहोवा, तोर सामर्थ ह अऊ बढ़य; हमन तोर सक्ति के गीत गाबो अऊ परसंसा करबो।