Salmi 18

Il Signore è la mia rocca

Sa direktor sang mga manugkanta. Ang kanta nga ginsulat ni David nga alagad sang Ginoo. Ginkanta niya ini sa Ginoo sang ginluwas siya sang Ginoo sa kay Saul kag sa iban pa niya nga mga kaaway. Ginahigugma ko ikaw, Ginoo. Ikaw ang akon kusog. ²Ikaw, Ginoo, ang akon [palalipdan nga] bato, ang akon mabakod nga palanaguan kag manughilway. Bilang [palalipdan nga] bato, makapanago ako sa imo. Ikaw ang akon taming, gamhanan nga manluluwas, kag dalangpan. ³Dalayawon ka, Ginoo, kay kon magpangayo ako sang bulig sa imo ginaluwas mo ako sa akon mga kaaway.

⁴Ang kamatayon daw pareho sa lubid nga nagburambod sa akon kag pareho sa siod sa akon alagyan. Ang kalaglagan daw pareho sa mabaskog nga baha nga naglapaw sa akon. ⁵Gani sa akon kalisod nagpanawag ako sa [imo,]Ginoo. Nagpangayo ako sang bulig sa imo nga akon Dios, kag ginpamatian mo ang akon pangamuyo sa imo templo. ⁶Dayon naglinog, kag pati ang mga pundasyon sang mga bukid nag-uyog, tungod kay nangakig ka, Ginoo.

⁷Nagguwa ang aso sa imo ilong, kag sa imo baba nagguwa ang makahalalit nga kalayo kag nagadabadaba nga mga baga. ⁸Ginbuksan mo ang langit, kag nagpanaog ka nga nagatungtong sa madamol nga gal-om. ⁹Nagsakay ka sa kerubin, kag madasig ini nga naglupad samtang ginapalid sang hangin.

¹⁰Ginhimo mo ang kadulom nga tabon sa imo palibot. Nagpanago ka sa madamol nga gal-om. ¹¹Nagpangilat sa imo atubangan, kag halin sa panganod nagguwa ang mga yelo kag ang nagadabadaba nga mga baga. ¹²Ang tingog mo Ginoo, nga Labing Mataas nga Dios, nagdaguob sa langit.

¹³Ginpana mo sang kilat ang imo mga kaaway, kag nagpalalagyo sila nga nagasalasala. ¹⁴Sa imo nga pagsabdong kag puwerte nga kaakig [nagakahubas] ang dagat [kag] makita ang duta sa idalom sini, kag makita [man] ang pundasyon sang kalibutan. ¹⁵Halin sa langit gindawat mo ako kag ginkuha sa madalom nga tubig.

¹⁶Ginluwas mo ako sa akon gamhanan nga mga kaaway nga indi ko masarangan. ¹⁷Ginsalakay nila ako sang nalisdan ako, pero gin-apinan mo ako, Ginoo. ¹⁸Gindala mo ako sa lugar nga wala sing katalagman; ginluwas mo ako kay nalipay ka sa akon.

¹⁹Ginapakamaayo mo ako tungod nga matarong ang akon kabuhi kag wala ako sing may nahimo nga sala. ²⁰Kay ginasunod ko ang imo mga pamaagi kag wala ako nagbiya sa imo Ginoo, nga akon Dios. ²¹Ginatuman ko ang tanan mo nga sugo kag wala ko ginalapas ang imo mga pagsulundan.

²²Nakahibalo ka nga wala sing kasawayan ang akon kabuhi kag ginalikawan ko nga makasala. ²³Ginapakamaayo mo ako tungod nga nakita mo nga matarong ang akon kabuhi kag wala ako sing may nahimo nga sala. ²⁴Matutom ka sa mga matutom sa imo, kag maayo sa mga tawo nga maayo man.

²⁵Sinsero ka sa mga sinsero sa imo, kag maayo ka magpadihot sa mga malain. ²⁶Huo, ginaluwas mo ang mga mapainubuson, pero ginapaubos mo ang mga matinaas-taason. ²⁷Ginoo nga akon Dios, ikaw ang akon kasanag. Sa kadulom ikaw ang akon suga.

²⁸Sa imo bulig masarangan ko nga salakayon ang panong sang mga soldado, kag masarangan ko nga sakaon ang pader [nga nagapalibot sa siyudad]. ²⁹Ang imo pamaagi, O Dios, wala sing sala. Ang imo pulong masaligan gid. Pareho ka sa taming sa tanan nga nagapangayo sang proteksyon sa imo. ³⁰Ikaw lang, Ginoo, amo ang Dios; ikaw lang ang amon [palalipdan nga] bato.

³¹Ikaw ang nagahatag sa akon sang kusog kag ang nagabantay sa akon dalanon. ³²Ginapabaskog mo ang akon tiil pareho sa tiil sang usa, para maagwanta ko ang pagtaklad sa mataas nga mga lugar. ³³Ginahanas mo ako sa pagpakig-away pareho abi sa pagbinat sang mabakod nga pana.

³⁴Ginaprotektaran mo ako pareho sa taming, gani luwas ang akon kabuhi. Ginatipigan mo ako paagi sa imo gahom, kag paagi sa imo bulig nangin bantog ako. ³⁵Ginahatagan mo ako sang matawhay nga alagyan, gani wala nagakasandad ang akon mga tiil. ³⁶Ginlagas ko ang akon mga kaaway kag naabtan ko sila. Kag wala gid ako magbalik hasta nga nalaglag ko sila.

³⁷Ginlaglag ko sila kag natumba sila sa akon tiilan kag indi na sila makabangon pa. ³⁸Ginhatagan mo ako sang kusog sa pagpakig-away kag ginpadaog sa akon mga kaaway. ³⁹Ginpatal-as mo ang akon mga kaaway kag ginlaglag ko sila.

⁴⁰Nagpangayo sila sang bulig, pero wala sing may nagluwas sa ila. [Nagpanawag sila] sa imo, pero wala mo sila ginsabat. ⁴¹Gindugmok ko sila hasta nga daw pareho na lang sila sa yab-ok nga ginapalid sang hangin. Gintasak-tasak ko sila pareho sa lunang sa dalan. ⁴²Ginluwas mo ako sa rebelde nga katawhan. Ginhimo mo ako nga pangulo sang mga nasyon. Ang mga taga-iban nga lugar nagaalagad sa akon.

⁴³Pagkabati nila sa akon, nagatuman dayon sila sang akon mando. Nagaluhod sila sa akon sa kahadlok. ⁴⁴Nadulaan sila sang kaisog, gani nagaguwa sila sa ila mga palanaguan nga nagakurog sa kahadlok. ⁴⁵Buhi ka, Ginoo! Dalayawon ka nga akon [palalipdan nga] bato! Ginapakataas ko ikaw, O Dios nga akon manluluwas.

⁴⁶Ginabalusan mo ang akon mga kaaway, kag ginapasakop mo ang mga nasyon sa akon. ⁴⁷Ginaluwas mo ako sa akon mapintas nga mga kaaway, kag ginapadaog mo ako sa ila. ⁴⁸Gani padunggan ko ikaw sa mga nasyon, O Ginoo. Kantahan ko ikaw sang mga pagdayaw.

⁴⁹Ginahatagan mo sang dalagko nga mga kadalag-an ang imo pinili nga hari. Ginahigugma mo si David kag ang iya mga kaliwat hasta san-o.