Salmi 25

A te innalzo l'anima mia

Awit ni David. Ginoo nga akong Dios, kanimo ako nag-ampo ug nagsalig. Ayaw intawon itugot nga pildihon ako sa akong mga kaaway, aron dili ako maulawan. ²Ang tanan nga nagsalig kanimo dili maulawan, apan kadtong nagluib kanimo maulawan. ³Tudloi ako, Ginoo, sa imong mga pamaagi.

⁴Tudloi ako sa pagkinabuhi subay sa imong kamatuoran, kay ikaw ang Dios nga akong manluluwas. Nagsalig ako kanimo sa kanunay. ⁵Hinumdomi, Ginoo, ang imong kaluoy ug gugma nga imong gipakita sukad pa kaniadto. ⁶Ayaw na hinumdomi ang mga sala nga akong nahimo sa batan-on pa ako. Sumala sa imong gugma hinumdomi ako, Ginoo, aron mapakita mo ang imong kaayo.

⁷Maayo ug matarong ka, Ginoo, busa ginatudloan mo ang mga makasasala sa pamaagi sa pagkinabuhi. ⁸Gigiyahan mo ang mga mapainubsanon sa pagbuhat sa matarong. Gitudloan mo sila sa imong pamaagi. ⁹Sa tanan mong ginahimo, gipadayag mo ang imong pagkamahigugmaon ug pagkamatinud-anon ngadto sa mga nagtuman sa imong kasabotan ug kasugoan.

¹⁰Bisan daghan ang akong mga sala, Ginoo, pasayloa ako, tungod ug alang sa imong kadungganan. ¹¹Ang mga nagtahod kanimo, Ginoo, giyahan mo sa dalan nga angay nilang agian. ¹²Magkinabuhi sila nga mauswagon ug ang ilang mga kaliwat padayon nga magpuyo sa yuta sa Israel.

¹³Suod ka, Ginoo, sa mga nagtahod kanimo. Ginapahinumdoman mo sila sa imong kasabotan. ¹⁴Ginoo, kanunay akong nagdangop kanimo, kay ikaw ang nagluwas kanako gikan sa katalagman. ¹⁵Patalinghogi ako ug kaloy-i, kay nag-inusara ako ug dinaog-daog.

¹⁶Misamot pa gayod ang akong mga kalisdanan; luwasa ako sa akong mga kabalaka. ¹⁷Tan-awa ang akong mga pag-antos, ug pasayloa ang tanan kong mga sala. ¹⁸Tan-awa kon unsa kadaghan ang akong mga kaaway ug kon unsa kadako ang ilang pagdumot kanako.

¹⁹Tipigi ang akong kinabuhi ug luwasa ako! Ayaw ako pakaulawi, kay kanimo ako nagdangop. ²⁰Nagkinabuhi ako nga maligdong ug matarong, busa hinaut nga panalipdan mo ako kay nagsalig ako kanimo. ²¹Luwasa, O Dios, ang mga Israelinhon sa tanan nilang mga kalisdanan.