Salmi 118

La pietra che i costruttori hanno rifiutato

Pasalamati ang Ginoo, kay maayo siya; ang iyang gugma walay kataposan. ²Ang katawhan sa Israel moingon, “Ang iyang gugma walay kataposan.” ³Ang mga kaliwat ni Aaron moingon, “Ang iyang gugma walay kataposan.” ⁴Ang mga nagtahod sa Ginoo moingon, “Ang iyang gugma walay kataposan.” ⁵Sa akong kalisod, nanawag ako sa Ginoo, ug gitubag niya ako pinaagi sa pagluwas kanako.

⁶Kauban ko ang Ginoo, busa dili ako mahadlok. Unsay mahimo sa tawo batok kanako? ⁷Kauban ko ang Ginoo. Siya ang nagtabang kanako, ug makita ko gayod ang pagkapildi sa akong mga kaaway. ⁸Mas maayo pa nga modangop sa Ginoo kaysa mosalig sa isigka-tawo.

⁹Mas maayo pa nga modangop sa Ginoo kaysa mosalig sa mga tawo nga anaa sa gahom. ¹⁰Gilibotan ako sa daghang mga nasod, apan gipildi ko sila pinaagi sa gahom sa Ginoo. ¹¹Tinuod nga gilibotan nila ako, apan gipildi ko sila pinaagi sa gahom sa Ginoo.

¹²Daw mga putyukan sila nga naglibot kanako, apan napugngan sila dayon nga daw daob sa dagami nga dali rang napalong. Gipildi ko sila pinaagi sa gahom sa Ginoo. ¹³Giataki nila ako pag-ayo ug hapit na gayod ako nila mapildi, apan gitabangan ako sa Ginoo. ¹⁴Ang Ginoo mao ang naghatag kanako ug kusog ug siya ang akong awit. Siya ang akong manluluwas.

¹⁵Pamatia ang panaghugyaw sa mga katawhan sa Dios diha sa ilang mga tolda tungod sa ilang kadaogan: “Kini nga kadaogan gihimo sa Ginoo pinaagi sa iyang gahom! Ang gahom sa Ginoo mao ang nagpadaog kanato!” ¹⁶Dili pa ako mamatay; magpabilin pa akong buhi. Isaysay ko ang gipanghimo sa Ginoo. ¹⁷Gisilotan ako pag-ayo sa Ginoo, apan wala niya itugot nga mamatay ako.

¹⁸Ablihi ang mga pultahan sa Templo sa Ginoo alang kanako, kay mosulod ako ug magpasalamat sa Ginoo. ¹⁹Mao kini ang pultahan sa Ginoo diin ang mga matarong lang ang makasulod. ²⁰Magpasalamat ako kanimo, Ginoo, kay gitubag mo ang akong pag-ampo. Ikaw ang kaluwasan alang kanako.

²¹Ang bato nga gisalikway sa mga panday mao pa hinuon ang nahimong pundasyon nga bato. ²²Gihimo kini sa Ginoo ug katingalahan kaayo kini. ²³Mao kini ang adlaw diin gipadaog kita sa Ginoo, busa maglipay ug magsadya kita.

²⁴Ginoo, nagpangamuyo kami kanimo, luwasa intawon kami. Hatagi kami ug kalamposan. ²⁵Hinaut nga panalanginan sa Ginoo ang hari nga iyang pinadala. Ug kamong mga tawo, hinaut nga panalanginan usab kamo sa Ginoo gikan dinhi sa iyang Templo. ²⁶Ang Ginoo, Dios; ug maayo kaayo siya kanato. Magdala kita ug mga sanga sa kahoy sa pagsaulog sa pista, ug molibot kita sa halaran.

²⁷Ginoo, ikaw ang akong Dios; nagpasalamat ako ug gadayeg kanimo. ²⁸Pasalamati ang Ginoo, kay maayo siya; ang iyang gugma walay kataposan.