Salmi 74
Perché ci hai respinti per sempre
1༼ཨ་སབ་ཀྱི་བསླབ་བྱའི་མགུར༌མ།༽ ཀྱེ་ཀྱེ་དཀོན་མཆོག་ཁྱེད་ཀྱིས་དུས་གཏན༌དུ། །ངེད་རྣམས་སྤངས་པའི་རྒྱུ་མཚན་ཅི་ཡིན༌ནམ། །ཁྱེད་ཉིད་རང་གི་རྩྭ་རའི་ལུག་ཁྱུ༌ལ། །ཐུགས་ཁྲོ་དུ་བ་བཞིན་དུ་འཕྱུར་བ༌ཅི།། 2གནའ་དུས་ཁྱེད་ཀྱིས་ཉོས་པའི་མི་ཚོགས༌ཏེ། །ཁྱེད་ཀྱིས་བླུས་ཤིང་ནོར་སྐལ་ཡིན་པའི༌སྡེ། །ཉིད་ཀྱི་གདན་ས་ཛ་ཡན་རི་དྲན༌མཛོད།། 3ཡུན་རིང་ཞིག་རོར་ལུས་པའི་ཡུལ་རྣམས༌དང༌། །དགྲ་ཡིས་གནས་མཆོག་ནང་དུ་བྱས་པ༌ཡི། །གཏོར་བརླག་ཀུན་ལ་གཟིགས་ཕྱིར་ཕེབས་པར༌མཛོད།། 4ཁྱེད་ཀྱི་ཚོགས་དཀྱིལ་དགྲ་ཡིས་ཀུ་ཅོ༌བསྒྲགས། །དེ་ཚོས་རང་གི་དར་ཆ་རྟགས་སུ༌བསླངས།། 5དེ་དག་ནགས་ཚལ་སྟུག་པོའི་ཤིང་སྡོང༌རྣམས། །སྟ་རེ་འཕྱར་ནས་གཅོད་པའི་མི་དང༌མཚུངས།། 6ད་ནི་གནས་མཆོག་ནང་གི་བརྐོས་རིས༌རྣམས། །དེ་ཚོས་སྟ་རེ་ཐོ་བས་རྡུལ་དུ༌བརླགས།། 7ཁྱེད་ཀྱི་གནས་མཆོག་ཉིད་ནི་མེ་རུ༌བསྲེགས། །ཁྱེད་མཚན་གདན་སར་དམོད་ཅིང་ཁྱོན་ནས༌བརླགས།། 8དེ་ཚོའི་སེམས་སུ་ང་ཚོས་བཙན་གནོན༌བྱ། །ཞེས་སུ་སྙམ་ཞིང་ཡུལ་ཕྱོགས་ཐམས་ཅད༌དུ། །དཀོན་མཆོག་ཆོས་ཁང་ཡོད་ཚད་རྩད་ནས༌བསྲེགས།།
9ང་ཚོས་ངོ་མཚར་རྟགས་རྣམས་མི་མཐོང༌ཞིང༌། །ལུང་སྟོན་མེད་ལ་འདི་བཞིན་ནམ་དུས༌བར། །ལུས་འོང་ཤེས་མཁན་རང་ཅག་ཁྲོད་དུ་མེད།། 10དགྲ་བོས་ནམ་བར་སྨད་འོང་ཀྱེ་དཀོན༌མཆོག །དགྲ་ཡིས་རྟག་ཏུ་ཁྱེད་མཚན་སྨད་འགྱུར༌རམ།། 11ཁྱེད་ཀྱིས་ཕྱག་གཡས་བསྐུམས་པ་ཅི་ཡིན༌ནམ། །ཕྱག་གཡས་བཏོན་ནས་ཁོ་རྣམས་ཚར་ཆོད༌ཅིག། 12ས་གཞིའི་སྟེང་དུ་ཐར་ལམ་གནང་བ༌ཡི། །དཀོན་མཆོག་གནའ་ནས་བདག་གི་རྒྱལ་པོ༌ཡིན།། 13ཁྱེད་ཀྱི་སྟོབས་ཀྱིས་རྒྱ་མཚོ་ཁག་གཉིས༌བཤགས། །ཆུ་ནང་སྲིན་པོའི་མགོ་བོ་གཅོག་པར༌མཛད།། 14ཁྱེད་ཀྱིས་ཆུ་སྲིན་རྣམས་ཀྱི་མགོ་བོ༌གཏུབས། །དབེན་སྟོང་གནས་པའི་མི་ལ་ཟས་སུ༌གནང༌།། 15ཁྱེད་ཀྱིས་ཆུ་མིག་ཆུ་ཕྲན་ཕྱེས་པ༌དང༌། །བཞུར་རྒྱུན་གཙང་པོ་རྣམས་ནི་བསྐམས་པར༌མཛད།། 16ཉིན་དང་མཚན་མོ་གཉིས་ཀ་ཁྱེད་ཀྱི༌ཡིན། །འོད་དང་ཉི་མ་ཁྱེད་ཀྱིས་བཤམས་པ༌འོ།།
17ས་གཞིའི་མཐའ་མཚམས་ཐམས་ཅད་ཁྱེད་ཀྱིས༌མཛད། །དབྱར་དགུན་གཉིས་ཀ་ཁྱེད་ཀྱིས་མཛད་པ༌ཡིན།། 18ཀྱེ་ཀྱེ་ཡ་ཝཱེ་དགྲ་ཡི་འཕྱ་སྨོད༌དང༌། །གླེན་པས་ཁྱེད་མཚན་སྐུར་བཏབ་དྲན་པར༌མཛོད།། 19ཁྱེད་ཀྱི་ཕུག་རོན་གཅན་གཟན་ལ་མ༌སྤྲོད། །གཏན་དུ་ཁྱེད་ཀྱི་དབུལ་པོའི་སྲོག་མ༌བརྗེད།། 20ས་སྟེང་མུན་ཁམས་གདུག་རྩུབ་གནས་ཀྱིས༌ཁེངས། །དེའི་ཕྱིར་ཞལ་ཆད་ཐུགས་སུ་འཛིན་པར༌འཚལ།། 21བཙན་གནོན་ཐེབས་པ་སྐྱེངས་ནས་ཕྱིར་མ༌མངག །ནོར་མེད་དབུལ་པོས་ཁྱེད་མཚན་བསྟོད་པར༌ཤོག། 22ཀྱེ་ཀྱེ་དཀོན་མཆོག་ཁྱེད་ཉིད་ཡར་བཞེངས༌ནས། །རང་གི་ཆེད་དུ་དག་འབུད་མཛད་པར༌ཞུ། །གླེན་པས་ཉིན་གང་སྨད་པ་དྲན་དུ༌གསོལ།། 23ཁྱེད་ཀྱི་སྡང་དགྲའི་སྐད་ཅོར་ཚ་པོ༌དང༌། །དགྲ་བོའི་ཆད་མེད་འུར་སྒྲ་དྲན་པར༌མཛོད།།