Sofonia 2
Cercate il Signore, umili del paese
הִתְקוֹשְׁשׁוּ וָקוֹשּׁוּ; הַגּוֹי לֹא נִכְסָף׃ 2בְּטֶרֶם לֶדֶת חֹק, כְּמֹץ עָבַר יוֹם; בְּטֶרֶם לֹא־יָבוֹא עֲלֵיכֶם, חֲרוֹן אַף־יְהוָה, בְּטֶרֶם לֹא־יָבוֹא עֲלֵיכֶם, יוֹם אַף־יְהוָה׃ 3בַּקְּשׁוּ אֶת־יְהוָה כָּל־עַנְוֵי הָאָרֶץ, אֲשֶׁר מִשְׁפָּטוֹ פָּעָלוּ; בַּקְּשׁוּ־צֶדֶק בַּקְּשׁוּ עֲנָוָה, אוּלַי תִּסָּתְרוּ, בְּיוֹם אַף־יְהוָה׃
Il giudizio sulla Filistia
4כִּי עַזָּה עֲזוּבָה תִהְיֶה, וְאַשְׁקְלוֹן לִשְׁמָמָה; אַשְׁדּוֹד, בַּצָּהֳרַיִם יְגָרְשׁוּהָ, וְעֶקְרוֹן תֵּעָקֵר׃ ס 5הוֹי, יֹשְׁבֵי חֶבֶל הַיָּם גּוֹי כְּרֵתִים; דְּבַר־יְהוָה עֲלֵיכֶם, כְּנַעַן אֶרֶץ פְּלִשְׁתִּים, וְהַאֲבַדְתִּיךְ מֵאֵין יוֹשֵׁב׃ 6וְהָיְתָה חֶבֶל הַיָּם, נְוֹת כְּרֹת רֹעִים וְגִדְרוֹת צֹאן׃ 7וְהָיָה חֶבֶל, לִשְׁאֵרִית בֵּית יְהוּדָה עֲלֵיהֶם יִרְעוּן; בְּבָתֵּי אַשְׁקְלוֹן, בָּעֶרֶב יִרְבָּצוּן, כִּי יִפְקְדֵם יְהוָה אֱלֹהֵיהֶם וְשָׁב (שבותם) שְׁבִיתָם׃
Il giudizio su Moab e Ammon
8שָׁמַעְתִּי חֶרְפַּת מוֹאָב, וְגִדּוּפֵי בְּנֵי עַמּוֹן; אֲשֶׁר חֵרְפוּ אֶת־עַמִּי, וַיַּגְדִּילוּ עַל־גְּבוּלָם׃ 9לָכֵן חַי־אָנִי נְאֻם יְהוָה צְבָאוֹת אֱלֹהֵי יִשְׂרָאֵל, כִּי־מוֹאָב כִּסְדֹם תִּהְיֶה וּבְנֵי עַמּוֹן כַּעֲמֹרָה, מִמְשַׁק חָרוּל וּמִכְרֵה־מֶלַח וּשְׁמָמָה עַד־עוֹלָם; שְׁאֵרִית עַמִּי יְבָזּוּם, וְיֶתֶר (גוי) גּוֹיִי יִנְחָלוּם׃ 10זֹאת לָהֶם תַּחַת גְּאוֹנָם; כִּי חֵרְפוּ וַיַּגְדִּלוּ, עַל־עַם יְהוָה צְבָאוֹת׃ 11נוֹרָא יְהוָה עֲלֵיהֶם, כִּי רָזָה, אֵת כָּל־אֱלֹהֵי הָאָרֶץ; וְיִשְׁתַּחֲווּ־לוֹ אִישׁ מִמְּקוֹמוֹ, כֹּל אִיֵּי הַגּוֹיִם׃
Il giudizio su Cus e Assiria
12גַּם־אַתֶּם כּוּשִׁים, חַלְלֵי חַרְבִּי הֵמָּה׃ 13וְיֵט יָדוֹ עַל־צָפוֹן, וִיאַבֵּד אֶת־אַשּׁוּר; וְיָשֵׂם אֶת־נִינְוֵה לִשְׁמָמָה, צִיָּה כַּמִּדְבָּר׃ 14וְרָבְצוּ בְתוֹכָהּ עֲדָרִים כָּל־חַיְתוֹ־גוֹי, גַּם־קָאַת גַּם־קִפֹּד, בְּכַפְתֹּרֶיהָ יָלִינוּ; קוֹל יְשׁוֹרֵר בַּחַלּוֹן חֹרֶב בַּסַּף, כִּי אַרְזָה עֵרָה׃ 15זֹאת הָעִיר הָעַלִּיזָה הַיּוֹשֶׁבֶת לָבֶטַח, הָאֹמְרָה בִּלְבָבָהּ, אֲנִי וְאַפְסִי עוֹד; אֵיךְ הָיְתָה לְשַׁמָּה, מַרְבֵּץ לַחַיָּה, כֹּל עוֹבֵר עָלֶיהָ, יִשְׁרֹק יָנִיעַ יָדוֹ׃ ס