Proverbi 12

Chi ama la disciplina ama la conoscenza

Kiu amas instruon, tiu amas scion; Sed kiu malamas atentigon, tiu estas malsaĝulo. ²Bonulo akiras favoron de la Eternulo; Sed homo malica estos kondamnita. ³Ne fortikiĝos homo per malvirto; Sed la radiko de virtuloj ne ŝanceliĝos.

⁴Brava virino estas krono por sia edzo; Sed senhonora estas kiel puso en liaj ostoj. ⁵La pensoj de virtuloj estas justeco; La meditado de malvirtuloj estas malico. ⁶La paroloj de malvirtuloj estas insido pri sango; Sed la buŝo de virtuloj ilin savas.

⁷La malvirtuloj renversiĝos kaj malaperos; Sed la domo de virtuloj staros forte. ⁸Oni laŭdas homon laŭ lia saĝo; Sed perversulo estos hontigita. ⁹Pli bona estas homo negrava, sed laboranta por si, Ol homo, kiu serĉas honoron, sed al kiu mankas pano.

¹⁰Virtulo kompatas la vivon de sia bruto; Sed la koro de malvirtuloj estas kruela. ¹¹Kiu prilaboras sian teron, tiu havos sate da pano; Sed kiu serĉas vantaĵojn, tiu estas malsaĝulo. ¹²Malvirtulo serĉas subtenon de malnobluloj; Sed la radiko de virtuloj donas forton.

¹³Per siaj pekaj vortoj kaptiĝas malbonulo; Sed virtulo eliras el mizero. ¹⁴Per la fruktoj de sia buŝo homo bone satiĝas; Kaj laŭ la merito de siaj manoj homo ricevas redonon. ¹⁵La vojo de malsaĝulo estas ĝusta en liaj okuloj; Sed saĝulo aŭskultas konsilon.

¹⁶Malsaĝulo tuj montras sian koleron; Sed saĝulo ignoras ofendon. ¹⁷Kiu estas verama, tiu eldiras tion, kio estas ĝusta, Sed falsama atestulo trompon. ¹⁸Ofte nepripensita parolo vundas kiel glavo; Sed la lango de saĝuloj sanigas.

¹⁹Parolo vera restas fortike por ĉiam; Sed parolo malvera nur por momento. ²⁰Malico estas en la koro de malbonintenculoj; Sed ĉe la pacigantoj estas ĝojo. ²¹Nenio malbona trafos virtulon; Sed la malvirtuloj havas plene da malbono.

²²Abomenaĵo por la Eternulo estas buŝo mensogema; Sed kiuj agas laŭ vero, tiuj plaĉas al Li. ²³Saĝa homo kaŝas scion; Sed la koro de malsaĝuloj elkrias malsaĝecon. ²⁴La mano de diligentuloj regos; Sed mano maldiligenta pagos tributon.

²⁵Zorgo en la koro de homo ĝin premas; Sed amika vorto ĝin ĝojigas. ²⁶Al la virtulo estas pli bone, ol al lia proksimulo; Sed la vojo de malvirtuloj ilin erarigas. ²⁷Maldiligenteco ne pretigos al si manĝon; Sed homo diligenta havas riĉecon.

²⁸Sur la vojo de virto estas vivo, Kaj ĝi estos ebenigita kontraŭ morto.