Salmi 105

Ricordate le meraviglie che ha compiuto

Santleen Aji Sax ji, tudd turam, xamley jalooreem ci biir xeet yi. ²Woyleen ko, tagg ko, yégleleen mboolemi kéemaanam! ³Damooleen turam wu sell, yal na kuy wut Aji Sax ji am bànneexu xol.

⁴Wutleen Aji Sax ji, sës ci dooleem. Saxooleen koo wër! ⁵Fàttalikuleen ay jalooreem aki kéemaanam aki àtteem. ⁶Yeen askanu Ibraayma, jaamam ba, yeen sëti Yanqóoba, yeen ñi mu tànn!

⁷Kee di sunu Yàlla Aji Sax ji, di àtte suuf sépp, ⁸di fàttaliku ba fàww kóllëreem, ak kàddoom ga mu digoon Ibraayma, ba ci junniy maas, te mu giñal ko Isaaxa, ⁹dëggalal ko Yanqóoba, sàrtal ko, fase kook Israayil mooma kóllëre gu sax.

¹⁰Moo noon: «Yaw laay jox réewum Kanaan, muy sa cér, nga séddoo.» ¹¹Ba bànni Israayil doonee ñu néewa néew, diy doxandéem ci réew mi, ¹²di wëreelu ci biir xeetoo xeet, ak nguuroo nguur, ¹³mayul nit mu noot leen, te yaral na leen ay buur, ¹⁴ne leen: «Buleen laal ñi ma séddoo, te samay yonent buleen leen lor.»

¹⁵Moo wàcce ab xiif ca réew ma, dagge fa lépp luy gub, ¹⁶yónnee ku leen jiitu, muy Yuusufa ma ñu jaayoon njaam, ¹⁷tànk ya, ñu jéng jéng yu tar, baat ba, ñu yeewe caqu weñ.

¹⁸Kàddug Aji Sax ji di nattu Yuusufa, ba keroog pirim ma dikk, ¹⁹Buur a yónni ku ko yiwi, ku yilifi xeet a ko tijji. ²⁰Mu sas ko mu jiite këram, di saytu mboolem alalam, ²¹ba saña tënk jawriñi buur ci coobareem, tey xelal mag ña.

²²Israayil agsi Misra, muy nganug Yanqóoba ga ca réewum Xam. ²³Aji Sax ji giiral xeetam wa, ba ñu gëna bare seeni noon, ²⁴mu xiir waa Misra ci dëddu ñoñam, ñuy fexeel jaamam ñooña.

²⁵Mu yónni Musaa, jaamam ba, tànn Aaróona, boole ca, ²⁶ñu sottal ci seen biir firndeem ya mu waxoon, muy kéemaan ya ñu def ca réewum Xam. ²⁷Moo yónnee lëndëm, lëndëmal, te Musaa ak Aaróona gàntaluñu kàddoom.

²⁸Moo soppi seen ndoxum réew deret, rey seeni jën, ²⁹feesal seen réew ay mbott yu àkki seen biir néegi buur ya. ³⁰Moo àddu, weñ ya dikk, yoo ya dajal seen réew ma.

³¹Mu def seenub taw tawub yuur, sawaray melax jafal seen réew ma. ³²Mu dal ci seen figg ak reseñ, daaneel seen garabi réew ma. ³³Mu àddooti, ay soccet dikk, di njéeréer yu wees ab lim, ³⁴ñu lekk luy gàncax ca seenum réew, lekk lu suuf sa meññ.

³⁵Moo faat luy taaw ca seenum réew, muy lu njëkka soqeekoo seen digg doole. ³⁶Mu génne leen, ñu yóbbaale xaalis ak wurus, te kenn tërëful ca seeni giir. ³⁷Misra daa bég ba ñu demee ndax tiitaange ju ñu leen tiital.

³⁸Mu firiw niir, yiire leen, ak sawara, ñu niitoo guddi. ³⁹Ñu sàkku, mu wàcceey picci përëntaan, teg ca reggal leen mburum asamaan. ⁴⁰Mu bënnu doj, ndox ma ball, di dex, wale joor gu wow.

⁴¹Daa bàyyi xel kàddoom gu sell, ga mu waxoon Ibraayma, jaamam ba. ⁴²Moo génne ñoñam, ñu bég, moo génne tànnéefam ña, ñuy sarxolle. ⁴³Mu jox leen suufi yéefar ya, ñu jagoo ñaqi xeet ya, ⁴⁴ngir ñu sàmm ay dogali yoonam, topp ndigali yoonam. Màggalleen Ki Sax!