Salmi 96

Cantate al Signore, tutta la terra

Chante a SENYÈ a yon chan tounèf! Chante a SENYÈ a tout latè a. ²Chante a SENYÈ a! Beni non Li! Pwoklame bòn nouvèl Sali a Li de jou an jou. ³Pale glwa Li pami nasyon yo, zèv mèvèy Li yo pami tout pèp yo.

⁴Paske gran se SENYÈ a! Li merite gran lwanj. Fòk Li resevwa krentif nou pi wo ke tout dye yo. ⁵Paske tout dye a pèp yo se zidòl, men SENYÈ a te fè syèl yo. ⁶Tout bèlte ak majeste devan L. Pwisans ak bèlte rete nan sanktyè Li a.

⁷Bay a SENYÈ a, O fanmi a pèp yo, bay a SENYÈ a glwa ak pwisans. ⁸Bay a SENYÈ a glwa a non Li. Pote yon ofrann e antre nan lakou Li yo. ⁹Adore SENYÈ a nan abiman ki sen. Tranble devan L, tout latè a.

¹⁰Pale pami nasyon yo, “SENYÈ a renye.” Anverite, mond lan etabli byen solid. Li p ap ebranle menm. SENYÈ a va jije pèp yo avèk jistis. ¹¹Kite syèl yo vin kontan e kite latè rejwi. Kite lanmè a fè gwo bri ansanm ak tout sa ki ladann. ¹²Kite chan yo leve fè kè kontan, ak tout sa ki ladann yo. Epi tout bwa nan forè yo va chante ak jwa ¹³devan SENYÈ a, paske L ap vini. Paske L ap vini pou jije latè. Li va jije mond lan avèk ladwati e pèp yo ak fidelite Li.