Salmi 64

Nascondimi dal consiglio dei malvagi

Кіраўніку хору. Псальм Давіда. ²Пачуй, Божа, голас мой у смутку маім! Ад страху [перад] ворагам захавай жыцьцё маё! ³Схавай мяне ад таемных [намераў] злачынцаў, ад грамады тых, што чыняць нягоднае, ⁴якія навастрылі як меч язык свой, нацягнулі [лук са] стрэламі сваімі — горкімі словамі, ⁵каб страляць з засады ў беззаганнага; зьнянацку страляюць яны ў яго і не баяцца.

⁶Яны ўмацоўваюць сябе ў справах ліхіх; змаўляюцца пастку [наставіць] таемна; яны кажуць: «Хто гэта ўбачыць?» ⁷Яны шукаюць беззаконьня, мы гінем праз задумы беззаконныя! Бо нутро чалавека і сэр­ца — глыбокія [воды]. ⁸І стрэліць Бог у іх стралою, зьнянацку атрымалі яны ўдар, ⁹і яны спатыкнуліся праз язык свой; і ўцякаюць усе, хто іх убачыў.

¹⁰І будуць баяцца ўсе людзі, і будуць апавядаць пра справы Божыя, і будуць разважаць пра тое, што Ён учыніў. ¹¹Узрадуецца праведнік у ГОСПАДЗЕ і будзе мець надзею ў Ім, і будуць хваліць Яго ўсе шчырыя сэрцам.