Salmi 51

Crea in me un cuore puro

Кіраўніку хору. Псальм Давіда, ²калі прарок Натан прыйшоў да яго пасьля таго, як ён увайшоў да Батшэвы. ³Зьлітуйся нада мною, Божа, паводле міласэрнасьці Тваёй, і праз вялікую літасьць Тваю даруй правіны мае!

⁴Абмый мяне ўсяго ад беззаконьня майго і ачысьці мяне ад грэху майго. ⁵Бо я ведаю правіну маю, і грэх мой перада мною заўсёды. ⁶Супраць Цябе, толькі супраць Цябе саграшыў я і ліхое ўчыніў перад вачыма Тваімі, бо Ты праведны ў словах Тваіх і чысты ў судзе Тваім.

⁷Вось, я ў беззаконьні нарадзіўся, і ў грэху зачала мяне маці мая. ⁸Вось, Табе даспадобы праўда ў нутры, дык дай мне пазнаць мудрасьць у сэрцы маім. ⁹Акрапі мяне ізопам, каб я ачысьціўся; абмый мяне, каб я стаўся бялейшым за сьнег.

¹⁰Дай мне пачуць радасьць і вясёласьць, каб узьвесяліліся косткі, якія Ты скрышыў. ¹¹Адвярні аблічча Тваё ад грахоў маіх і прабач мне ўсе беззаконьні мае. ¹²Сэрца чыстае ствары ў-ва мне, Божа, і дух упэўнены аднаві ў-ва мне.

¹³Не адкінь Ты мяне ад аблічча Твайго і Духа Сьвятога Твайго не забірай у мяне! ¹⁴Вярні мне радасьць збаўленьня Твайго, і духам шляхетным падтрымай мяне, ¹⁵і я буду навучаць адступнікаў шляхам Тваім, і грэшнікі вернуцца да Цябе.

¹⁶Вызваль мяне ад [віны] за кроў, Божа, Бог выратаваньня майго, і язык мой будзе крычаць пра праведнасьць Тваю. ¹⁷Адчыні, Госпадзе, вусны мае, і вусны мае будуць абвяшчаць хвалу Тваю. ¹⁸Бо Ты не жадаеш ахвяраў, хоць бы я іх даў, і цэласпаленьні не даспадобы Табе.

¹⁹Ахвяра для Бога — скрышаны дух; сэрцам скрышаным і зламаным Ты, Божа, не пагарджаеш! ²⁰Рабі добрае Сыёну паводле ласкі Тваёй, збудуй муры Ерусаліму. ²¹Тады будуць Табе даспадобы ахвяры праведнасьці, цэласпаленьні і ахвяры дасканалыя; тады быкоў узьнясуць на ахвярнік Твой.