Numeri 3
I figli di Aaronne
ואלה תולדת אהרן ומשה ביום דבר יהוה את משה בהר סיני: 2ואלה שמות בני אהרן הבכור נדב ואביהוא אלעזר ואיתמר: 3אלה שמות בני אהרן הכהנים המשחים אשר מלא ידם לכהן: 4וימת נדב ואביהוא לפני יהוה בהקרבם אש זרה לפני יהוה במדבר סיני ובנים לא היו להם ויכהן אלעזר ואיתמר על פני אהרן אביהם:
I Leviti servono i sacerdoti
5וידבר יהוה אל משה לאמר: 6הקרב את מטה לוי והעמדת אתו לפני אהרן הכהן ושרתו אתו: 7ושמרו את משמרתו ואת משמרת כל העדה לפני אהל מועד לעבד את עבדת המשכן: 8ושמרו את כל כלי אהל מועד ואת משמרת בני ישראל לעבד את עבדת המשכן: 9ונתתה את הלוים לאהרן ולבניו נתונם נתונם המה לו מאת בני ישראל: 10ואת אהרן ואת בניו תפקד ושמרו את כהנתם והזר הקרב יומת: 11וידבר יהוה אל משה לאמר: 12ואני הנה לקחתי את הלוים מתוך בני ישראל תחת כל בכור פטר רחם מבני ישראל והיו לי הלוים:
13כי לי כל בכור ביום הכתי כל בכור בארץ מצרים הקדשתי לי כל בכור בישראל מאדם עד בהמה לי יהיו אני יהוה:
I Leviti sono contati
14וידבר יהוה אל משה במדבר סיני לאמר: 15פקד את בני לוי לבית אבתם למשפחתם כל זכר מבן חדש ומעלה תפקדם: 16ויפקד אתם משה על פי יהוה כאשר צוה: 17ויהיו אלה בני לוי בשמתם גרשון וקהת ומררי: 18ואלה שמות בני גרשון למשפחתם לבני ושמעי: 19ובני קהת למשפחתם עמרם ויצהר חברון ועזיאל: 20ובני מררי למשפחתם מחלי ומושי אלה הם משפחת הלוי לבית אבתם:
La famiglia di Gherson
21לגרשון משפחת הלבני ומשפחת השמעי אלה הם משפחת הגרשני: 22פקדיהם במספר כל זכר מבן חדש ומעלה פקדיהם שבעת אלפים וחמש מאות: 23משפחת הגרשני אחרי המשכן יחנו ימה: 24ונשיא בית אב לגרשני אליסף בן לאל: 25ומשמרת בני גרשון באהל מועד המשכן והאהל מכסהו ומסך פתח אהל מועד: 26וקלעי החצר ואת מסך פתח החצר אשר על המשכן ועל המזבח סביב ואת מיתריו לכל עבדתו:
La famiglia di Cheat
27ולקהת משפחת העמרמי ומשפחת היצהרי ומשפחת החברני ומשפחת העזיאלי אלה הם משפחת הקהתי: 28במספר כל זכר מבן חדש ומעלה שמנת אלפים ושש מאות שמרי משמרת הקדש: 29משפחת בני קהת יחנו על ירך המשכן תימנה: 30ונשיא בית אב למשפחת הקהתי אליצפן בן עזיאל: 31ומשמרתם הארן והשלחן והמנרה והמזבחת וכלי הקדש אשר ישרתו בהם והמסך וכל עבדתו: 32ונשיא נשיאי הלוי אלעזר בן אהרן הכהן פקדת שמרי משמרת הקדש:
La famiglia di Merari
33למררי משפחת המחלי ומשפחת המושי אלה הם משפחת מררי: 34ופקדיהם במספר כל זכר מבן חדש ומעלה ששת אלפים ומאתים: 35ונשיא בית אב למשפחת מררי צוריאל בן אביחיל על ירך המשכן יחנו צפנה: 36ופקדת משמרת בני מררי קרשי המשכן ובריחיו ועמדיו ואדניו וכל כליו וכל עבדתו: 37ועמדי החצר סביב ואדניהם ויתדתם ומיתריהם:
Mosè e Aaronne davanti alla tenda
38והחנים לפני המשכן קדמה לפני אהל מועד מזרחה משה ואהרן ובניו שמרים משמרת המקדש למשמרת בני ישראל והזר הקרב יומת: 39כל פקודי הלוים אשר פקד משה ואהרן על פי יהוה למשפחתם כל זכר מבן חדש ומעלה שנים ועשרים אלף:
Il riscatto dei primogeniti
40ויאמר יהוה אל משה פקד כל בכר זכר לבני ישראל מבן חדש ומעלה ושא את מספר שמתם: 41ולקחת את הלוים לי אני יהוה תחת כל בכר בבני ישראל ואת בהמת הלוים תחת כל בכור בבהמת בני ישראל: 42ויפקד משה כאשר צוה יהוה אתו את כל בכר בבני ישראל: 43ויהי כל בכור זכר במספר שמות מבן חדש ומעלה לפקדיהם שנים ועשרים אלף שלשה ושבעים ומאתים: 44וידבר יהוה אל משה לאמר: 45קח את הלוים תחת כל בכור בבני ישראל ואת בהמת הלוים תחת בהמתם והיו לי הלוים אני יהוה: 46ואת פדויי השלשה והשבעים והמאתים העדפים על הלוים מבכור בני ישראל: 47ולקחת חמשת חמשת שקלים לגלגלת בשקל הקדש תקח עשרים גרה השקל:
48ונתתה הכסף לאהרן ולבניו פדויי העדפים בהם: 49ויקח משה את כסף הפדיום מאת העדפים על פדויי הלוים: 50מאת בכור בני ישראל לקח את הכסף חמשה וששים ושלש מאות ואלף בשקל הקדש: 51ויתן משה את כסף הפדים לאהרן ולבניו על פי יהוה כאשר צוה יהוה את משה: