Psalms 148

Let heaven and earth praise him

¡Aleluya! ¡Tayta Diosga alabasha cachun! Tayta Diosta alabay-llapa syëlucho cajcuna. Tayta Diosta alabay-llapa janajcho cajcuna. ²Alabay-llapa llapan anjilnincuna. Alabay-llapa syëlucho caycaj suldäruncuna. ³Alabay inti, quilla. Alabay-llapa achicyaj goyllarcuna.

⁴Alabay syëlu, syëlu jananpa asulyaraycaj yacupis. ⁵Ruracänanpaj juc shimi niptinmi llapan ruracaran. Chaypita Tayta Diosta alabay-llapa. ⁶Tayta Diosmi llapanta camacächisha imay-yajpis cananpaj. Camacächishancuna mana imaypis rucacänanpämi niran.

⁷Tayta Diosta alabay-llapa cay pachacho cajcuna. Lamarcho tiyaj waräcuycuna Tayta Diosta alabay-llapa. Lamarpa rurincho caycajcunapis Tayta Diosta alabay. ⁸Tayta Diosta alabay räyu, runtu tamya. Alabay rashta, pucutay. Tayta Dios nishanta wiyacoj löcu wayra alabay. ⁹Tayta Diosta alabay-llapa puntacuna, puytush lömacuna. Alabay-llapa sedru guerucuna, frütata wayoj yöracuna.

¹⁰Tayta Diosta alabay-llapa manshu animalcuna, chucaru animalcuna, äbicuna, culebracuna. ¹¹Tayta Diosta alabay-llapa cay pachacho caj raycuna. Llapan nasyuncunapa mandajnincuna Tayta Diosta alabay-llapa. ¹²Tayta Diosta alabay-llapa mösupis jipashpis, chachacunapis wamracunapis.

¹³Tayta Diosta llapayqui alabay-llapa. Payllami llapanpita mas rispitashaga caycan. Payllami cay pachacho cajcunapitapis syëlucho cajcunapitapis mas munayniyoj caycan. ¹⁴Paymi munayniyojyächisha acrashan runacunataga. Tayta Diosta rispitajcuna, llapan Israelcuna payllata alabay-llapa. ¡Aleluya! ¡Tayta Diosga alabasha cachun!