Lamentations 3

I am the man who has seen affliction

Ko ahau te tangata kua kite i te pōuri, he mea nā te rākau o tōna riri. ²I ārahina e ia, i meinga kia haere i te pōuri, kāhore i te mārama. ³He pono kua tahuri mai ia ki ahau, kua anga mai tōna ringa ki ahau, ā pau noa te rā.

⁴Kua meinga nei e ia ōku kikokiko me tōku kiri kia rite ki ō te koroheke, mangungu kau i a ia ōku wheua. ⁵Kua hangā e ia he patu mōku; karapotia ana ahau ki te wai kawa, ki te raruraru. ⁶Kua meinga ahau e ia kia noho ki ngā wāhi pōuri, kia pērā me te hunga kua mate noa ake.

⁷Kua oti ahau te taiepa mai e ia, tē puta atu ahau; kua meinga e ia tōku mekameka kia taimaha. ⁸Āe rā, i ahau e karanga ana, e hāmama ana kia āwhinatia, ka āraia mai e ia tāku īnoi. ⁹Kua oti anō ōku ara te taiepa mai e ia ki te kōhatu tārai, whakakōpikopikoa ake e ia ōku ara.

¹⁰Ko tōna rite ki ahau kei te pea e whanga ana, kei te raiona i ngā wāhi ngaro. ¹¹Whakangaua kētia ana e ia ōku ara, haehaea pūtia iho ahau; meinga ana ahau e ia kia noho kau noa iho. ¹²Kua whakapikoa e ia tāna kōpere, ā, whakatūria ake ahau e ia hei kōperenga pere.

¹³Kua meinga e ia ngā pere o tāna papa pere kia ngoto ki ōku whatumanawa. ¹⁴Kua waiho ahau hei katanga mā tōku iwi katoa; hei waiata mā rātou ā pau noa te rā. ¹⁵Kua whakakīia ahau e ia ki ngā mea kawa, whakainumia rawatia ana ahau e ia ki te taru kawa.

¹⁶Kua whatiwhatiia anō hoki e ia ōku niho ki te kirikiri, hīpokina ana ahau e ia ki te pungarehu. ¹⁷Kua nekehia atu e koe tōku wairua kei tata ki te rangimārie; i wareware ahau ki te pai. ¹⁸Kī tonu ake ahau, “Kua pirau tōku kaha, kāhore he tūmanakohanga māku ki a Ihowā.”

His mercies are new every morning

¹⁹Mahara ki tōku ngākau mamae, ki tōku pōuri, ki te taru kawa, ki te wai kawa! ²⁰Māharahara tonu tōku wairua ki a rātou, piko tonu iho i roto i ahau. ²¹E whakahokia ake ana tēnei e ahau ki tōku ngākau, koia i tūmanako ai ahau.

²²He mahi tohu nā Ihowā tē poto ai tātou, he kore nō āna mahi aroha e mutu. ²³E hou tonu ana rātou i tēnei ata, i tēnei ata; he nui tōu pono. ²⁴“Ko Ihowā te wāhi mōku,” e ai tā tōku wairua; “nō reira ka tūmanako ahau ki a ia.” ²⁵He pai a Ihowā ki te hunga e tūmanako ana ki a ia, ki te wairua e rapu ana i a ia.

²⁶He pai anō kia tūmanako te tangata, kia tatari mārie hoki ki tā Ihowā whakaora. ²⁷He pai anō mō te tangata kia amohia e ia te ioka i tōna tamarikitanga. ²⁸Me noho ia, tōna kotahi, me whakarongo puku hoki, nō te mea nāna i uta ki a ia.

²⁹Me tuku e ia tōna māngai ki te puehu; mehemea pea tērā he tūmanakohanga. ³⁰Me hoatu e ia tōna pāpāringa ki te tangata e papaki ana i a ia; kia kī tonu ia i te tāwai. ³¹E kore hoki e mau tonu tā Ihowā panga.

³²Ahakoa whakapōuri ia, ka aroha anō ia, ka rite ki te nui o tāna mahi tohu. ³³Kāhore hoki ōna ngākau whiu, whakapōuri rānei, i ngā tama a te tangata. ³⁴Ko te kuru i ngā herehere katoa o te whenua ki raro i ōna waewae; ³⁵ko te whakapeau kē i te tika o te tangata ina whakawākia i te aroaro o te Runga Rawa; ³⁶ko te whakariro kē i tā te tangata ina totohe, e kore tēnā e whakapaingia e te Ariki.

Let us examine our ways

³⁷Ko wai tēnei hei kī mai, ā, ka oti, i te mea kīhai i whakahaua e te Ariki? ³⁸He teka ianei e puta mai ana te kino me te pai i roto i te māngai o te Runga Rawa? ³⁹He aha te tangata ora i amuamu ai, te tangata ina whiua mō ōna hara?

⁴⁰E rapu tātou, e kimi i ō tātou ara, ā, ka tahuri anō ki a Ihowā. ⁴¹Kia ara atu ō tātou ngākau me ō tātou ringa ki te Atua i te rangi. ⁴²I hē mātou, i whakakeke; kīhai anō koe i muru i tō mātou hē.

⁴³Kua hīpokina nei e koe ki te riri, tūkinotia ana mātou e koe; tukitukia ana e koe, kīhai anō i tohungia e koe. ⁴⁴Hīpokina ana e koe he kapua ki a koe, kei puta atu tā mātou īnoi. ⁴⁵Kua meinga mātou e koe hei paru tāhinga, hei mea ākiri i waenga i ngā iwi.

⁴⁶Kua hāmama mai ngā māngai o ō mātou hoariri katoa ki a mātou. ⁴⁷Ko te wehi, ko te rua, kua tae mai kei a mātou, te whakamōtī me te wāwāhi. ⁴⁸Kei te tārere nei ngā awa wai i tōku kanohi, mō te wawāhanga o te tamāhine a tōku iwi.

⁴⁹Māturuturu ana te wai i tōku kanohi, kāhore hoki e mutu, tē ai he pārīrātanga, ⁵⁰kia titiro mai rā anō a Ihowā, kia kite mai rā anō ia i runga i te rangi. ⁵¹E meatia iho ana tōku ngākau e tōku kanohi, mō ngā tamāhine katoa o tōku pā.

⁵²Kua whāia kinotia ahau ānō he manu e rātou, e te hunga e hoariri ana ki ahau, kāhore he take. ⁵³Ngaro iho i a rātou tōku ara i roto i te poka, kua makā e rātou he kōhatu ki runga ki ahau. ⁵⁴I rere ngā wai i runga i tōku māhunga; i mea ahau, “Kua motuhia kētia ahau.” ⁵⁵I karanga ahau ki tōu ingoa, e Ihowā, i roto i te poka i raro rawa.

⁵⁶I rongo koe ki tōku reo; “Kaua e hunā tōu taringa ki te tānga o tōku manawa, ki tāku karanga.” ⁵⁷I whakatata mai koe i te rā i karanga ai ahau ki a koe; i kī mai koe, “Kaua e wehi.” ⁵⁸Kua tohea e koe, e te Ariki, ngā tohe a tōku wairua; kua hokona e koe tōku ora.

⁵⁹Kua kite koe, e Ihowā, i te hē i mahia ki ahau. Māu e whakarite tāku whakawā. ⁶⁰Kua kite koe i tō rātou mauāhara katoa, i ō rātou whakaaro katoa mōku. ⁶¹Kua rongo koe ki tā rātou tāwai, e Ihowā, ki ō rātou whakaaro katoa mōku; ⁶²ki ngā ngutu o te hunga i whakatika mai ki ahau, ki tā rātou tikanga mōku, ā pau noa te rā.

⁶³Tirohia mai tō rātou nohoanga iho, tō rātou whakatikanga ake; ko ahau te waiatatia nei e rātou. ⁶⁴Hoatu he utu ki a rātou, e Ihowā, kia rite ki te mahi a ō rātou ringa. ⁶⁵Hoatu ki a rātou he ngākau pakeke, tāu kanga ki a rātou.

⁶⁶Whāia rātou i runga i te riri, whakangaromia atu rātou i raro i ngā rangi o Ihowā.