Psalms 111

The beginning of wisdom

Tamandani Yehova. Ndidzathokoza Yehova ndi mtima wanga wonse mʼbwalo la anthu olungama mtima ndi pa msonkhano. ²Ntchito za Yehova nʼzazikulu; onse amene amakondwera nazo amazilingalira. ³Zochita zake ndi za ulemerero ndi zaufumu, ndipo chilungamo chake ndi chosatha.

⁴Iye wachititsa kuti zodabwitsa zake zikumbukirike; Yehova ndi wokoma mtima ndi wachifundo. ⁵Amapereka chakudya kwa amene amamuopa Iye; amakumbukira pangano lake kwamuyaya. ⁶Waonetsa anthu ake mphamvu ya ntchito zake, kuwapatsa mayiko a anthu a mitundu ina.

⁷Ntchito za manja ake ndi zokhulupirika ndi zolungama; malangizo ake onse ndi odalirika. ⁸Malamulo ndi okhazikika ku nthawi za nthawi, ochitidwa mokhulupirika ndi molungama. ⁹Iyeyo amawombola anthu ake; anakhazikitsa pangano lake kwamuyaya dzina lake ndi loyera ndi loopsa.

¹⁰Kuopa Yehova ndicho chiyambi cha nzeru; onse amene amatsatira malangizo ake amamvetsa bwino zinthu. Iye ndi wotamandika mpaka muyaya.