Psalms 60

Victory comes from God

Kumqondisi wokuhlabelela. Kulandelwa itshuni ethi, “Iluba lesiVumelwano.” Imikithamu kaDavida. Elokufundisa. Lapho alwa lo-Aramu Naharayimu lo-Aramu Zobha, njalo lapho uJowabi athi ekubuyeni kwakhe walahla phansi ama-Edomi azinkulungwane ezilitshumi lambili eSigodini seTswayi. Ususilahlile, Oh Nkulunkulu, wabhidliza izinqaba zethu; ubukade uthukuthele, manje ake usivuselele! ²Usulizamazamisile ilizwe waliqhekeza; namathisela iminkenke yalo ngoba selivevezela. ³Ubabonisile abantu bakho izikhathi ezilukhuni; usiphe iwayini elisenza sidiyazele.

⁴Kodwa kulabo abakwesabayo usuphakamise uphawu lokubahlanganisa ndawonye. ⁵Sisindise, usisize ngesandla sakho sokunene, ukuze bonke labo obathandayo bakhululwe. ⁶UNkulunkulu usekhulumile esendlini yakhe engcwele: “Ngokunqoba ngizayaba iShekhemu, ngihlole leSigodi saseSukhothi.

⁷Ngeyami iGiliyadi, loManase ngowami; u-Efrayimi yisivikelo sekhanda lami, uJuda uyintonga yami yobukhosi. ⁸IMowabi ngumganu wami wokugezela, phezu kuka-Edomi ngiphosela amanyathelo ami; phezu kweFilistiya ngihalalisa umkhosi wokunqoba.” ⁹Ngubani ozangisa emzini olenqaba na? Ngubani ozangiholela e-Edomi na?

¹⁰Kakusuwe na, Oh Nkulunkulu, wena osusilahlile, ongasaphumi lathi ezimpini zethu? ¹¹Ake usisize ezitheni zethu, ngoba usizo lomuntu luyize. ¹²Nxa siloNkulunkulu sizanqoba, njalo uzazinyathelela phansi izitha zethu.