Psalms 22

My God, why have you forsaken me

Kumqondisi wokuhlabela. Kulandela itshuni ethi, “Impalakazi yekuSeni.” Ihubo likaDavida. Nkulunkulu wami, Nkulunkulu wami, kungani usungidelile na? Kungani ukhatshana kokungisindisa, khatshana kwamazwi okububula kwami? ²Oh Nkulunkulu wami, ngiyakhala emini, kodwa kawuphenduli; ebusuku, kangithulanga. ³Kanti usesihlalweni sobukhosi uNguye oNgcwele uyindumiso ka-Israyeli.

⁴Obaba babeka ithemba labo Kuwe; bona bathemba wena wabakhulula. ⁵Bakhala kuwe bakhululwa; bathemba kuwe kabaze badaniswa. ⁶Kodwa ngiyimpethu nje kangisumuntu, ngihozwa ngabantu njalo abanengi bangeyise.

⁷Bonke abangibonayo bayangihleka; bayangithethisa baze banyikinye amakhanda: ⁸“Uthemba uThixo lowo Thixo kamkhulule. Kamsindise njengoba ethokoza ngaye.” ⁹Kanti wena wangikhupha esiswini; wangenza ngakuthemba kusukela ebeleni likamama.

¹⁰Kusukela ekuzalweni kwami ngabekwa ezandleni Zakho; kusukela esiswini sikamama ulokhu unguNkulunkulu wami. ¹¹Ungabi khatshana kwami, ngoba uhlupho luseduze njalo kakho ongangisiza. ¹²Inkunzi ezinengi zingihanqile; inkunzi ezilamandla zaseBhashani zingihonqolozele.

¹³Izilwane ezibhongayo ezibamba zidabudabule zingikhamisela imilomo yazo. ¹⁴Ngiyathululeka njengamanzi, njalo amathambo ami wonke akhumukile. Inhliziyo yami isiphenduke yaba yingcino; isincibilikile ngaphakathi kwami. ¹⁵Amandla ami asetshile qhu ingathi ludengezi, lolimi lwami luyanamathela elwangeni lwami; uyangilalisa othulini lokufa.

¹⁶Izinja sezingihanqile; ixuku labantu ababi selingihonqolozele, sebengigwaze izandla lezinyawo. ¹⁷Ngingawabala wonke amathambo ami; abantu bayanginyonkoloza bangiklolodele. ¹⁸Behlukaniselana izembatho zami njalo benze inkatho ngezigqoko zami.

¹⁹Kodwa wena, Thixo, ungabi kude lami. Ungamandla ami, woza masinyane uzongisiza. ²⁰Phephisa impilo yami enkembeni, impilo yami eligugu emandleni azo izinja. ²¹Ngilamulela emlonyeni wezilwane; ngisindisa empondweni zezinyathi.

²²Ngizamemezela ibizo Lakho kubafowethu; emphakathini ngizakudumisa. ²³Lina elimesabayo uThixo, mdumiseni! Lani lina zizukulwane zikaJakhobe, mbabazeni! Mhlonipheni, lina lonke zizukulwane zika-Israyeli! ²⁴Ngoba keyisanga loba adelele ukuhlupheka kwalowo ohlukuluzwayo; kamfihlelanga ubuso bakhe kodwa walalela ukukhala kwakhe ecela ukusizwa.

²⁵Sivela kuwe isithathelo sokudumisa kwami emhlanganweni omkhulu; ngizagcwalisa izifungo zami phambi kwalabo abakwesabayo. ²⁶Abayanga bazakudla basuthe labo abamdingayo uThixo bazamdumisa sengathi inhliziyo zenu zingaphila nini lanini! ²⁷Yonke imikhawulo yomhlaba izakhumbula iphendukele kuThixo, njalo lezimuli zonke zezizwe zizakhothama phansi phambi kwakhe, ²⁸ngoba umbuso ungokaThixo njalo uyabusa phezu kwezizwe.

²⁹Zonke izinothi zomhlaba zizazitika ngokudla njalo zikhonze; bonke abangena othulini bazaguqa phambi Kwakhe labo abangeke baziphilise. ³⁰Abesikhathi esizayo bazamkhonza; izizukulwane zizakwaziswa ngoThixo. ³¹Bazatshumayela ukulunga kwakhe, ebantwini abangakazalwa ngoba ukwenzile Yena.